Projek blong rod long aelan blong Tanna, hemi pat blong developem ol infrastraktsa olsem rod mo wof long olgeta aelan blong Vanuatu blong mekem se pipol long aelen i save kamap wetem bisnis blong olgeta. Long Saut blong Tanna, ol tsif mo pipol blong olgeta, oli talem se stat long Green Point igo kasem long Imaki, oli kat big potensiol blong developem agrikaltsa be problem nao, hemi gudfala rod blong transpotem ol prodak blong olgeta ikam kasem long Lenakel maket o Lenakel wof blong hemi save kam long Port Vila. Ol tsif i talem se ol pipol blong olgeta, oli kat ol hekta blong bush istap blong mekem timba, oli kat buluk, kofi, kava mo fish be problem nao, hemi rod. Oli talem se nomata long rabis kondisen blong rod we istap naoia, olgeta i stil gohet blong fidim pipol long Lenakel wetem fresh kakae long karen. Oli talem tankiu long gavman blong hemi save luk save nid blong olgeta blong mekem se oli save kat akses blong salem ol prodak blong karen blong olgeta.

Spre blong kolta long yestede, hemi bin pulum attensen blong plande pipol blong Tanna we oli neva luk kolta o kolta rod. Sam long olgeta, oli mas livim ples blong olgeta long metel bush blong kam luk CCECC, hemi spre long kolta long rod blong olgeta. Wan fama blong Metel Bush i talem se oli glad bigwan blong gavman i save helpem olgeta. Hemi talem se naoia we rod blong olgeta i gud mo bae hemi kam kolta, bae hemi sevem taem blong olgeta blong kam long Lenakel blong salem ol prodak blong olgeta. Hemi talem se aelan blong Tanna, hemi wan aelan we hemi pem plande toyota trak be oli no save stap long taem folem nogud kondisen blong rod. Wetem stat wok we gavman istap mekem naoia long Tanna, hemi lukim tu ova long 10 bus seves we oli stap sevesem pipol naoia long Black Man taon.