Trak blong toti, hemi no stap ron nomo blong pikimap toti long Port Vila mo Luganville. Black Man Taon tu long Tanna, hemi kat wan blong hem. Folem kuik developmen we hemi stap tekem ples naoia long Lenakel long Tanna, hemi lukim munisipaliti hemi pem wan trak blong stap pikimap ol toti.

Wan long olgeta eria we ikat nid blong trak blong toti long hem, hemi eria blong maket long Lenakel. Long taem we hemi de blong maket, ol famili oli kam raon long aelan blong Tanna blong salem ol prodak blong karen blong olgeta. Taem we maket i finis long end blong de bae ol famili ia ino save gobak wetem ol empti samting olsem lif kokonas basket. Oli lego istap long ples blong maket. Trak blong toti, hemi help tu blong pikimap ol toti blong ol sto we oli saed saed rod mo ol nara bisnis olsem bangalow long Lenakel.