Arch-bishop blong Church of Melanesia, George Takeli hemi mitim Akting Praem Minista Ham Lini long tiusde 16 May long ofis blong praem minista long Port Vila. Mr Lini i talem long Arch-bishop Takeli se hemi taem blong jioj mo gavman i wok tugeta blong helpem ol pipol blong tufala. Hemi bin wan okesen blong Mr Lini i tokbaut rilesensip we istap bitwin ol pipol blong Vanuatu mo olgeta blong Solomon Islands. Mr Lini, hemi tokbaut bigfala kastom seremoni we oli bin mekem long Port Vila folem ded blong wan studen blong Malaita long Port Vila. Arch-bishop Takeli i talem se hemi wan hona blong hem blong hemi save mit wetem wan akting PM blong wan kantri olsem Vanuatu. Hemi talem long Mr Lini se hemi bringim greeting long hem mo pipol blong Vanuatu. Arch-bishop i talem se hemia i fes visit blong hem ikam long Vanuatu afta we hemi tekem posisen blong hem. Hemi talem se jioj blong hem, hemi valiu Vanuatu olsem wan impoten patna mo visit blong hem ia, hemi blong rikonfomem bridge we hemi stap bitwin jioj mo gavman mo pipol blong Vanuatu. Hemi konfomem long akting praem minista se hemi tekem desisen finis se sinod blong Church of Melanesia, bae hemi stap long Port Vila long end blong yia ia long National Convention Center long Port Vila. Arch-bishop Takeli i talem se hemia i fes taem we sinod ia bae hemi stap autsaed long Solomon Islands mo hemia hemi soem se jioj, hemi kat rus blong hem long Vanuatu. Hemi talem se hemi hapi bigwan long patnasip we jioj hemi kat wetem gavman long saed blong edukesen mo health mo jioj bae hemi gohet blong prea from gavman blong Vanuatu. Anglican jioj, hemi wan long olgeta jioj we hemi kat ol skul stat long praemeri igo kasem long sekendri. Hemi kat tu ol teknikol skul mo haus meresin.
![Takeli i mitim Akting PM Lini](/images/20170516_105720.jpg)