Praem Minista Charlot Salwai, Memba blong Palaman blong Tanna, Nako Natuman mo ambassada blong China long Vanuatu, Liu Quan, oli mekem wan saed visit igo long long las sarere namba 7 Julae 2017 blong lukim progrogress blong kolta rod blong aelan.

 

Taem we delegesen i kasem airport i bin kat wan kastom welkam seremoni we ol chief mo pipol blong aelan ia, oli mekem,. Afta long welkam seremoni, delegesen i bin muv igo long Imaelone vilej, ples end blong kolta rod istap long hem naoia stat long airport.

 

Mr Salwai mo delegesen blong hem, oli visitim tu ples we oli stap krasem ol ston long hem long Imlau eria blong putum long kolta rod.  Afta long Imlau, oli muv muv igo kasem Green Point we hemi eria we end blong PHASE 1 blong kolta rod, hemi stop long hem. Praem Minista i talem se hemi hapi long progress we wok blong rod ia, hemi hemi stap long hem naoia. Mr Salwai i talem se ol tok tok we istap go raon se bae inomo kat seken PHASE blong konstraksen blong rod ia, hemi no tru tok tok. Hemi talem se bae gavman i saenem yet seken PHASE blong kolta rod stat long Green Point igo kasem long Saut Tanna.

Hemi talem tankiu long ol chief mo pipol blong Tanna, blong oli save givim graon mo ston blong olgeta blong sapotem developmen blong rod long aelan.

Mr Salwai i talem se wan developmen, hemi save kirap nomo long land be ino long air o long solwota. 

Ol pipol blong Port Vila we oli stap go lukim rod ia, oli talem se kolta rod blong Tanna, hemi sakem long way kolta rod blong Port Vila mo Luganville. ol man CCECC we oli stap mekem rod, oli stap ramem wait ston mo hemi plande level bifo oli oli save putum kolta. Long saed blong ol bigfla hil, oli katem mo flatem gud. Ol pipol blong Tanna i talem se ol hil ia bifo taem we hemi ren, ol trak ino save klaem mo hemi mekem se hemi hat blong kasem long saut blong aelan ia. Oli mekem tu ol rel wetem ol smen long ol ples we hemi denjeres olsem ol klif mo krik. Ol pipol blong Tanna, oli talem se ren, hemi stap sloem daon wok blong mekem kolta rod blong olgeta. Oli talem se taem we hemi ren be CCECC ino wok. Nomata we rod ino finis gud yet long saed blong PHASE 1 be ikat saen blong ol smosmol ekonomik aktiviti tu, hemi tekem ples. Ol niu vilej, ol kava ba mo rod maket, oli kirap long saedsaed rod.