Praem Minista Charlot Salwai, hemi visitim long las wik developmen blong wok long Korman Stedium long Port Vila. Risen bihaen long visit, hemi blong mekem sua se wok i finis gud blong Vanuatu i save hostem 2017 Mini Gem long Port Vila long manis disemba long yia.

 

Mr Salwai i mekem visit ia wetem minista blong sport, Simeon Seule mo ol sinia gavman ofisiol. Long taem blong visit ia, praem minista Salwai mo minista Seule, tufala i bin save lukim developmen blong wok long konstraksen blong stedium ia. Tufala i bin kasem toktok se wok blong buildim stedium ia, bae hemi finis bifo ofisiol opening blong gem mo bae ikat ofisiol handing ova bifo gem.Gavman blong China nao, bae hemi ofisioli handem ova stedium ia ikam long gavman blong Vanuatu bifo ofisiol opening blong hem mo blong gem. Long taem blong visit ia, delegesen blong praem minista i harem se oli testem finis ol naet long stedium ia mo oli lait gud. Praem Minista Salwai i talem se hemi glad long progres blong wok. Hemi talem se projek ia i bin kat plan blong mekem bifo koalisen blong we hemi lidim hemi fom mo long stat blong hem, i bin kat plande tok tok long hem be hemi glad blong kasem asurens se bae wok i finis long taem bifo gem i stat. CCECC we hemi wan kampani blong China, hem nao istap buildim Korman Stedium ia mo mani blong hem ikam long gavman blong China. Korman Stedium, hemi wan long olgeta projek we mani blong hem ikam long gavman blong China mo bae ikat ofisiol opening blong olgeta long yia. Ikat wof blong noten taon blong Luganville mo niu ofis blong praem minista we bae ikat ofisiol opening blong hem tu long yia ia.