Hok tri ia, hemi no wan hok tri olsem ol nara hok tri. Hemi pat mo hemi mekem histri blong aelan blong Tanna. Pipol blong aelan ia, oli biliv se aelan blong Tanna hemi bon wetem hok tri ia. Ol nara hok tri oli gru mo oli ded. Disasta hemi daonem ol hok tri be hemia we istap long foto ia, hemi stanap strong istap. Hok tri ia, hemi hemi stanap hem wan long wan klia ples mo klosap long long solwota be hemi no ded mo hamas strong saeklon i kilim aelan blong Tanna be oli no daonem. Hemi hok tri blong MAGIKGIKI we hemi tevel blong Tanna. Hemi tevel be hemi laef man tu from we hemi save apia o kamaut olsem man. Pes we hok tri istap long hem, hemi wan tabu eria blong aelan blong Tanna. Hemi heven blong aelan blong Tanna. Pipol blong Tanna i storian se samtaem taem yu wokbaut ikam long eria we hok tri istap long hem mo yu hangre o yu tosta, bae yu sek nomo wan man i karem kakae mo wota blong yu ikam.

Ples we hok tri blong MAGIKGIKI istap long hem, hemi ples we  fes level blong kolta rod blong Tanna i stop long hem. Seken level blong kolta rod projek ia, bae hemi stat long eria blong hok tri blong MAGIKGIKI ia nao igo kasem long saut Tanna. Praem minista Charlot Salwai, hemi bin visit kolta rod ia long las wiken igo kasem long hok tri blong MAGIKGIKI hemia long sarere namba 7 Julae.