Praem minista Charlot Salwai mo minista blong edukesen, tufala i talemaut long ol pipol blong Holen Nabanga long sarere 23 Julae se nekis yia 2018 bae gavman i ekstendem polisi blong fri akses long kidagarden mo yia 7 kasem yia 10. 

Mr Salwai mo Mr Nirua i talemaut long olgeta pipol se gavman bae hemi ple pat blong hem blong mekem se ikat fri akses blong edukesen stat long kidagarden igo kasem long yia 10 be ol papa mo mama tu, oli mas ple pat blong olgeta blong sendem ol pikinini igo long skul.

Mr Nirua i talem se gavman i save se ino kat skul long Holen be ol perens i mas mekem sua se long nekis yia, ol pikinini i mas go skul long ol skul we oli stap klosap go kasem taem sapos oli kat skul blong olgeta long Holen.

Praem minista Salwai i talem se yia 1 kasem yia 6, akses blong hem, hemi fri finis mo hem nao, hemi bin introdiusim polisi ia taem we hemi bin minista blong edukesen. Hemi talem se afta long sam yia we gavman i kamap wetem polisi blong fri akses ia, hemi fainemaut se taem we ol perens, oli pem kindagarden, hemi wan stamblingblok yet blong wan pikinini igo long yia 1 sapos ol perens, oli no save pem fi blong kindagarden. Mr Salwai i talem se ol kindagarden skul tede, oli sas bitim ol sekendri skul mo oli blokem akses blong wan pikinini i save go long yia 1. Tede skul i save akseptem nomo wan pikinini blong hemi save intarem yia 1 sapos hemi bin go tru long kindagarden skul. Mr Salwai i talem se taem we ino kat fri akses long kindagarden be hemi blokem tu wan pikinini blong kat fri akses long yia 1 igo antap. Praem minista i eksplenem long ol pipol blong Holen Vanuatu, hemi saenem tu intanasional konvensen blong wan pikinini i mas go long skul mo hemi mas stap long skul kasem taem we hemi kat 16 yia. Hemi talem se gavman i biliv se taem we wan pikinini blong Vanuatu bae hemi kasem yia 16, yia blong hem, hemi sapos araon 16 yia. Hemi talem se taem ia, wan pikinini hemi save finis wanem we hemi raet mo wanem we hemi rong. Praem minista i talem se taem we yumi lego ol pikinini oli finis skul taem we oli no save mekem difrens yet long wanem we i raet mo wanem we i rong, Vanuatu bae hemi fesem problem from hemi mas bitwin pem moa kontena blong putum ol kriminol long hem mo givim fri akses igo kasem yia 10. Praem minista i talem se fri akses stat long kindagarden igo kasem yia 10, hemi sapos blong givim taem long ol perens blong oli save sevem mani blong helpem ol pikinini long stadi b long olgeta  taem we oli stap intarem yia 12 igo antap blong oli save kat akses long skolasip. Hemi talem fri akses ia, hemi save mekem se wan famili we ino fainem inaf mani, hemi save sendem wan pikinini blong hem igo long skul. Hemi talem se tede, olgeta famili nomo we oli save fainem mani, oli save sendem pikinini blong olgeta igo long skul. Hemi talem se hemia i save gohet blong krietem wan hol bitwin ol pua mo ol rich famili. Mr Salwai mo Mr Nirua i talemaut long ol pipol  blong Holen se tede ikat plande pikinini we oli kasem gudfala edukesen. Gavman i spendem 600 milien vatu long evri yia long skolasip. Tufala i apil long ol papa mo mama blong Holen blong sendem ol pikinini blong olgeta igo long skul long nekis yia.