Wan long olgeta main poen blong tok tok blong praem minista Charlot Salwai long 37 indipendens aniverseri, hemi blong banem plastik blong Vanuatu ino impotem ikam long kantri. Ol smol aksen olsem 2 frut nakatabol mo wan grin kokonas blong go wetem long solwota, hemi save helpem bigwan tok tok blong Mr Salwai blong kipim envaeromen blong Vanuatu istap helti oltaem be hemi no kam wan plastik kantri.
Bae hemi tekem taem blong pipol blong Vanuatu oli kam blong luk save se kokonas mo ol nara lokol frut blong yumi, oli save kontribiut bigwan blong kipim envaeromen blong bits, solwota mo rif blong Vanuatu istap helti oltaem.
Tede fulap pipol, taem we oli go long solwota, oli ting ting blong resis igo long wan sto blong karem plastik jus o tin coca cola blong go wetem blongt swim long solwota o riva. Plane taem, taem oli finis swim, oli lego ol plastik mo ol tin long san bits o sakem long solwota be oli no save o oli save nomo se hemi no gud blong envaeromen be oli mekem. Plande pipol, oli tekem yet se riva mo solwota, hemi ol ples blong sakem ol toti long hem be oli no save se ol plastik hemi posenem ol rif mo fis. Wan frut kokonas mo 2 frut nakatabol, ino save kosem problem long rif mo posenem ol fis.
Long sande namba 13 Okis, Gavman Website, hemi bin fainem long san bits blong Mele 2 frut nakatabol mo wan frut kokonas we wan man o wan famili, hemi bin lego istap afta we oli finis swim. About 100 mita, ikat wan wan nara wan man o wan famili we i lego ol plastik chicken win istap mo go bak long haus. Man, woman o famili we hemi lego 2 frut nakatabol mo wan frut kokonas maet hemi no rialaesem be hemi wan bigfala lesen blong sapos, ol famili igo swim long riva o solwota, oli sapos blong mekem semak blong go wetem ol lokol kakae mo frut from oli save spolem envaeromen blong san bits mo solwota.Hemi wan smol fasin be bigfala toktok o meseij istap insaed.
Mele bits, hemi wan long olgeta bits blong Efate we istap fulap gud long sarere mo sande iven long taem blong ol pablik holide. Plande afta long ol swim ia o piknik, ikat plande plastik istap flot long solwota o man i save fainem long san bits. Plande pipol, oli tekem habit yet blong berem ol toti blong olgeta long san bits be oli no save se wan de bae solwota i save dikimaut toti ia.
Blong priservem envaeromen blong ol san bits blong Vanuatu mo sapotem Praem Minista Salwai blong banem plastik, Gavman Website, hemi apil strong long ol pipol blong Vanuatu, blong oli nomo go wetem ol plastik, botel o tin long solwota. Hemi inkarejem ol pipol blong Vanuatu blong go wetem ol lokol dring mo kakae blong Vanuatu. Hemi helti long solwota, rif, fis mo helti tu long laif blong man mo woman.