Gavman naoia, hemi no responsibol nogud kondisen blong PM haus

    Office blong praem minista i talem se gavman blong tede, hemi no responsibol long deterioration blong haus blong praem minista we istap long John Court.
    Office blong praem  minista, hemi wandem letem save se hemi mekem plande yia finis bifo gavman blong praem minista Charlot Salwai ikam long pawa we haus ia hemi bin stap long wan no gud kondisen. Sam man i bin brekem tufala geit mo go insaed mo stilim ol samting insaed. Oli bin brekem ol luva mo kat akses long ol rum insaed. Ikat bigfala bush tu i bin gru long yat blong residens blong praem minista long John Court.
    Ofis blong praem minista i talem se risen blong putum tufala staff blong PM igo lukautem slip long haus, hemi blong lukautem gud haus ia blong mekem se pablik inomo iusim olsem wan ples blong mekem "rendez-vous" blong olgeta.  Long saed blong alegesen blong oposisen se ol samting i lus insaed long haus, ofis blong praem minista, hemi wandem mekem save se plande long olgeta samting insaed, oli bin lus finis long haus bifo PM ofis i putum 2 staff blong hem igo long haus ia. Tufala staff ia tu, tufala i kontribiut blong katem grass blong mekem se ikat saen se hemi wan residensiol eria blong praem minista blong Ripablik blong Vanuatu komperem long yia we hemi pas.
    Ofis blong praem minista i wandem mekem save se ripot blong ol ting se i lus long ofis ia, hemi stap long hand blong polis i investigetem sins long las yia ia.
    Long saed blong ol pipol we oli bin stap yusum eria olsem wan ples blong rendez-vous, taem yumi putum tufala staff ia, hemi putum end blong pablik igo stap mekem naet lafet long yat ia.
    Long saed blong ol alegesen se we ofis blong oposisen, hemi mekem agensem tufala staff ia, ofis blong praem minista ino kasem komplen o ripot long hem mo hemi wandem talem long  ofis blong oposisen se sapos, hemi kasem ripot o komplen, bae hemi dil wetem. Ofis blong praem minista i kasem ripot se steitmen we opposition hemi mekem hemi folem ripot blong wan foma staff blong PM ofis we hemi tu, hemi bin stap fos blong hemi go slip long haus ia be hemi no bin kat janis.

    Offcanvas