Nomata wei delegesen blong West Papua hemi kam let tede long namba 14 rijenol miting blong ACP-EU, olgeta memba kaontri oli agri blong resem isiu long saed blong olgeta no gud fasin long saed blong human right wei I stap hapen long West Papua. Olgeta memba kaontri olgeta I stanap strong se nomata wei West Papua hemi no memba blong ACP, hemi wan kaontri blong Pasifik.
Memba blong Palemen blong konstituensi blong Santo, Marco Mahe, hemi talem se olgeta kaontri blong ACP olgeta I agri blong tokbaot fasin blong brekem human right wei I stap happen long West Papua long wan seperet miting bifo ofisol opening blong Joint Parliamentary Assembly (ACP – EU). Hemi talem se hemi wan isiu wei hemi had blong akseptem mo delegesen blong Vanuatu I agri se bae Lida blong oposisen, Ishmael Kalsakau, nao bambae hemi ripresentem olgeta mo givim toktok long fored blong Assembly. Tede long moning, I gat tu seperet miting bifo Presiden blong Ripablik blong Vanuatu, Pasta John Tallis Obed, hemi mekem ofisol opening. Co-Presiden blong ACP-EU Joint Parliamentary Assembly mo ACP Parliamentary Assembly, Ibrahim R. Bundu nao hemi jearem miting ia. Mote Octavianusnao hemi ripresentem West Papua.