Hae chief blong Maewo, RASA-URE, hemi serem wota blong ae blong hem long foret blong delegesen blong praem minista, Charlot Salwai long las satede long Kerebay afta we just ova long 300 pipol blong Ambae nomo, oli so long olgeta folem inkris blong aktivi blong volkeno, Manaro. RASA-URE hemi kestenem Mr Salwai se wehem ova long 3 000 pipol blong Ambae we gavman i bin talem se bae hemi sendem olgeta igo long Maewo. Hae chief ia, hemi talem se bifo gavman, hemi luk luk igo long ol nara aelan, Maewo mo Pentecost olsem papa mo mama folem kastom blong trifala aelan ia, tufala i redi blong hausem ova long 11 000 pikinini blong tufala. RASA-URE i talem se hemi harem nogud taem we gavman hemi promesem hae namba mo pipol blong hem, oli redi be smol nomo oli so. Hemi talem se nekis taem bae gavman, hemi nomo mekem olsem. Hemi talem se folem kastom blong Penama, hemi soem rod we oli pikinini blong Tagaro, oli bin aut long hem long Maewo blong oli go stap long Ambae. Hemi talem se long kaen situation olsem famili valiu mo koneksen, hemi very impotem. Hemi talem tankiu long olgeta chief mo pipol blong Santo blong oli save akseptem ol pikinini blong Tagaro igo long nasara blong olgeta. Hemi talem se papa we hemi aelan blong Maewo, hemi kat bigfala speis o bigfala graon istap blong hemi save risivim evri pipol blong Ambae.
Praem minista Salwai i talem sori long RASA-URE long wanem we hemi hapen. Mr Salwai i talem se desisen blong gavman, hemi blong luk luk festaem long Maewo mo Pentecost blong tufala i save hausem ol famili blong Ambae bifo, hemi save luk luk igo long nara aelan o nara provins. Presiden blong Penama provins we hemi bin stap tu long delegesen blong praem minista, Alban Garae, hem tu, hemi sori long ol chief mo pipol blong Ambae long wanem we hemi hapen.