Yestede MV Aganda i kasem Lolopuepue wetem ol fes famili blong Ambae blong go bak long home. Hemia hemi ol fes famili blong go bak home afta long evacuesen. Oli bin lego Samansen wof long yestede moning mo oli kasem Lolopuepue long yestede aftenun.
Olgeta ia we oli fes kasem Ambae long yestede, hemi stat long Nangire igo kasem Lolopuepue. Lolopuepue i wan long port we oli tsusum blong dropem ol famili blong Ambae. NDMO, hemi ripotem se hemia long yestede, hemi stat blong rapatriesen afta long evacuation. Afta hemia long yestede, tede igo i shut kat moa ship i dropem bak ova long 11 000 pipol blong Ambae long home blong olgeta. Long satede finis, ship hemi bin dropem ol wokman blong gavman blong oli save supavaisem araevol blong ol famili blong Ambae long home blong olgeta. Long wof long Luganville, ikat supevisen tu blong evri famili we oli stap depatt blong go bak home. Oli listim evri nem blong olgeta mo man ino save klaem long ship taem we oli no kolem nem blong hem. Evri man, woman mo pikinini, oli stap long list mo oli kolem wan-bae-wan bifo, hemi klaem long ship, Hemia blong mekem sua se oli no fogetem wan man o woman mo oli no sendem wan pikinini igo long difren ples long papa mo mama blong hem. NDMO long Luganville i ripotem se bifo ship i dropem ol famili blong Ambae bak home, oli putum finis ol kakae long ples blong olgeta.
Long taem blong visit blong praem minista Charlot Salwai igo long Santo, Pentecost mo Maewo, hemi asurem ol famili blong Ambae se rapatriesen blong olgeta bae hemi wan supavaes rapatriesen avoedem komplen.