Praem Minista Charlot Salwai, hemi saenem tede moning, wednesde 25 oktoba two kontrak blong dil dil wetem ol trak blong gavman. Wan kontrak, hemi blong GPS blong kontrolem ol trak blong gavman mo narawan, hemi blong fuel blong ol trak blong gavman.
Long saed blong saplaem fuel blong ol trak blong gavman, Au Bon Marche nao, hemi winim kontrak blong fidim ol trak blong gavman long fuel.
Long saed blong GPS, kampani blong Geo Cal nao, hemi winim kontrak blong hem. Praem Minista Salwai i talem se ol trak blong gavman, hemi oltaem isiu long evri yia we hemi lukim ol ova spending blong ol trak blong ol gavman dipatmen. Hemi talem se wetem instolesen GSP ia, hemi hop se bae inomo kat ova spending we dipatmen blong gavman bae oli mekem. Mr Salwai i talem se hemi evri bae ino save mestem blong lukim ol dipatmen, oli spendem moa mani long fuel long wanem we oli bin badget long hem. Hemi askem ol dipatmen we ikat ol essential seves blong gavman istap anda long olgeta blong kamap wetem wan gudfala badget blong mekem se bae ino kat ova spending.
Mr Salwai i talem se tede, ikat sam dipatmen we oli kat plande trak mo hemi askem Public Service blong oli kandem hamas trak naoia wan wan dipatmen, oli kat. Hemi talem se wetem E-GAVMAN, hemi sapos blong ridisum cost blong fuel be tede, ol trak oli ron ron plande yet from we ol wokman blong gavman, oli no iusim E-GAVMAN ia. Hemi talem se netwok ia istap long evri ofis wetem ol kompiuta mo telefon be still ol G trak, oli stap ron ron yet. Praem Minista Salwai i talem se hemi hop se wetem ius blong GPS sistem, bae ikat moa kontrol blong ius blong ol trak blong gavman. Hemi talem se ikat plande trak we ol dipatmen oli iusim we oli kam olsem donesen be yumi shuit mekem se ol dipatmen, oli kat trak inaf long olgeta nomo. Hemi talem se moa ikat plande trak mo moa bae ol trak ia, oli kakae fuel. Hemi askem Public Service tu blong kontrolem ol trak we oli iusim VE plet namba. Hemi talem se ikat sam wokman blong gavman we oli stap hait bihaen long plet namba ia.