Epi Chief Abela Tarboa ikat 5 woman

Chief Abela Tarboa, hemi kam wan popula chief blong aelan blong Epi tede from we hem wan nomo, hemi kat 5 woman. Ino kat wan moa chief blong aelan ia we hemi olsem hem. Gavman website, hemi bin kat janis blong mitim hem long namba 31 oktoba long Saut West Epi blong hemi save serem storian blong hem. Long taem ia ova long 10 pipol, oli bin raonem hem finis blong tekem foto blong hem mo rikodem storian blong hem wetem mobaelfon blong olgeta. Chief Abela i talem se bubu blong hem, hemi bin 5 woman tu. Hemi talem se long 1979, hemi maretem fes woman blong hem. Long 1989, hemi karem seken wan mo long 2000, hemi maretem nambatri woman blong hem. Hemi talem se ikat nara 2 we tufala istap long difren aelan be samtaem nomo tufala igo long Epi. Chief Abela i talem se olgeta 3 we hemi laef wetem olgeta oltaem long Epi, oli hapi evriwan  mo hemi lukautem gud olgeta. Hemi talem se mekem sua se evri woman blong hem ia, oli no trabol long ol samting olsem kakae long karen. Hemi talem se hemi kat bigfala mama blong karem mo taem we man igo long vilej blong hem, hemi no save trabol long kakae. Ol 5 woman blong hem ia, oli blong difren aelan. Hemi no karem wan blong Epi. Tede long Vanuatu, inomo kat plande man olsem chief Abela we hemi kat fulap woman. Chief, hemi no wan spesel man Epi nomo blong hemi save kat 5 woman be hemi joenem plande jioj tu. Hemi talem se naoia, hemi muslim. Pipol blong Epi i talem se chief Abela, hemi no wan man we hemi haitem storian blong hem. Hemi oltaem wan open man blong serem storian blong hem wetem ol pipol we oli wandem save.