Yumi kat 32 dei nomo I stap bifo Pasifik Mini Gems I ofisili Open. Wael yumi stap luk fowod long ofisel Opening, mi wantem yumi luk bak long wokbaot blong yumi blong kam kasem tedei:
Long February namba 10, 2011, Praem Minista long taem ia, Hon. Sato Kilman hemi bin saenem mo komitim kaontri long hosting blong Pasifik Mini Gems. Olsem rikwaemen blong Pasifik Gems jata, hem i bin karem sapot blong lida blong oposisen we long taem ia hemi Hon. Edward Natapei, Minista blong Yut mo Sports, Hon Moking Stephens mo Lord Mayor blong Host City we hemi Excellency Willie Satearoto. Yumi aknoledgem olgeta ia mo sherem wan 1minit silence blong 2 long tufala we I no longer stap wetem yumi, Late Hon. Edward Natapei mo Late Moking Stephens.
Long taem ia kasem mi tekem ap ofis, kavman komitmen mo sapot I bin slo be tudei mi wantem talem bikfala tankiu long Council blong ol Minista mo Paliament espesili wetem sapot blong Spika mo lida blong oposisen, kavman hemi mitim ful faenansol oblikesen olsem we I stap long host agriment. Tudei yumi luk se kaontri hemi redi blong not onli hostem wan saksesful gem be hemi redi blong no patisipet nomo be blong jalensem ol pawa haos blong spot long Pasifik.
Gems ia mi save talem se bai hemi wan difren gem from hemi fes taem we Kavman hemi fuli involvem hem blong priperem wan venue mo priperem wan tim. Hemia, mi wantem talem bikfala tankiu long Kavman blong pipol’s ripablik blong China blong patnasip we yumi save kat wetem olgeta blong sapot long venue wetem piperem wan Tim Vanuatu.
Long Tim Vanuatu, Council of Minista oli bin apruvum fands blong mek sua se I kat broadcast blong gems truaot long Vanuatu. So bai hol kaontri oli watjem yufala. Be praod se yufala I reprisentem kaontri. Tru long inisietif mo endorsement blong Kaonsel blong ol Minista, Nasonal Ambasada prokram ia hemi soem se kavman hemi bihaen long yufala. Mi bilif se I kat wan Legasi plan we Pasifik Gems Otoriti I stap priperem blong kam blong COM I endorsem. Mi hop se insaed long plan ia, yumi kat wan long tem visen blong mekem sua se ol jampion blong Pasifik Mini Gems ia, bai kavman hemi kontinu blong wok wetem VASANOC long ol inisietif mo insentif blong mekem sua se standed blong spot bai I kontinu blong impruv- I no long ol venue mo atlet nomo be long PE insaed long skuls mo skul gems, long ol manejment mo kojing tu mo hao yumi okanaesem ol nasonal gems. Long Pasifik gems ia, yumi tekem Janis ia blong iusum Pasifik mini Gems ia olsem wan steping ston blong putum sam atlet blong yumi blong kompit mo rikognaes long Olympik Gems long 2020 long Japan.
Wetem toktok ia, mi stap wantem wisim yufala Tim Vanuatu gudlak long ol trening blong yufala. Olsem Patron blong Bij Volibol tru long ambasada prokram, mi save finis se wan Gold I secured so mi stap apil long wanwan Minista blong yufala I wok had wetem ol federesen blong yufala blong karem sam medal tu.
Tankiu".