Tede moning extra-ordinary sesen blong palaman ino save gohet afta we ino kat quorum blong 34 memba blong palaman. Long tede moning spika blong palaman, Esmon Sae i talem se oli kandem namba blong ol memba we oli bin stap tede long chamber, hemi kasem nomo 31 be blong hemi kat quorum, namba hemi mas kasem 34 MP.
Tede moning, hemi lukim lida blong oposisen, Ishmael Kalsakau, hemi no bin kam wetem ol memba blong palaman blong oposisen. Ikat sam memba blong palaman blong gavman saed tu we oli no bin stap tede morning olsem minista blong climate change, Ham Lini we hemi stap long ovasi folem international miting blong climate change. Wetem 31 we oli stap long palaman tede moning mo ol gavman MP we oli no stap, hemi mekem wan total blong 36 evriwan we oli stap long gavman saed.
From we ino bin kat quorum bae palaman, hemi mit nomo long tasde blong tokbaut ol bill blong gavman. Extra-ordinary sesen ia we hemi las extra-ordinari sesen blong yia ia, gavman nao, hemi bin singautem blong tokbaut ol bill blong hem. Folem standing oda blong palaman o lo blong palaman, evri fes de blong ol sesen blong palaman, i mas kat quorum blong 52 memba blong palaman