Risafol mo appointmen blong 2 niu minista we praem minista Charlot Salwai, hemi mekem long yestede moning, hemi distebem mosen blong opposition. Iven risafol mo appointmen i distebem mosen be opposition ino sakem tawel. Opposition i bin stap kontakem ol MP blong gavman blong sapotem mosen blong hem igo kasem taem we bel hemi ring blong oli save go insaed long palaman blong dibetem mosen.
Wan memba blong palaman blong gavman saed, hemi talem se yestede long tina, opposition, hemi bin ringim hem blong go long Ramada Hotel be taem we hemi kasem hotel, hemi fainem se opoosition ino kat namba. Long ol risen blong mosen we 9 MP blong opposition, oli saenem mo oli dipositim long palaman, ikat 2 ples we i tokbaut BACKBENCHERS.
Fes risen, hemi talem se " the signing of PACER PLUS against the will of BACKBENCHERS" mo namba 3 risen blong mosen blong Ishmael Kalsakau hemi talem olsem " The failure of the government to implement the decentralization policy supported by majority of the MEMBERS OF PARLIAMENT". Sapos opposition, hemi talem tru tok tok bae yestede bae majoriti of the members of parliament we hemi stap kleim, oli sapos blong sapotem mosen be ino kat. Yestede, ikat 4 MP nomo we oli bin stap sidaon long gavman saed long olgeta de we i pas, oli go joenem opposition. Olgeta ia, ikat tufala MP blong Ambae, Jay Ngwele mo Alickson Vira, MP blong Embrym, Albert William mo MP blong Port Vila, Kalo Seule. Yestede ino kat majoriti blong palaman igo long opposition saed. Olgeta 4 yia nomo, oli go. Hemia i save minim se opposition ino talem tru toktok taem we hemi mensenem ol " BACKBENCHERS mo MAJORITY OF THE MEMBERS OF PARLIAMENT" long mosen blong hem. Hemi save hapen tu olsem se 4 MP we oli go joenem opposition long yestede, oli trapem 5 MP blong opposition se oli kat sapot blong gavman MP.
Yestede afta we mosen, hemi difit, sam gavman MP i talem se opposition, hemi bin stap kontaktem olgeta blong joenem opposition be ansa we oli givim long opposition se oli stap long gavman finis. Bae oli no save lego wan gavman blong go bak bagegen long nara gavman.
Wan long olgeta gavman MP ia, hemi talem autsaed long palaman se hemi taem naoia blong lukluk bagegen long lidaship blong opposition afta we hemi felem blong nara taem bagegen mosen blong no gat tras agensem Praem Minista Charlot Salwai. Hemi givim wan exampol long kompetisen blong wol kap se taem we wan national tim lusum wol kap, oli jenisim coach blong olgeta.