Vanuatu i tekem wan nara step long financial developmen blong hem taem we hemi pemaut long yestede, tasde 8 Februari 2017, 50 million vatu share long Asian Infrastructure Bank, AIIB.
Membaship blong Vanuatu long AIIB, hemi folem decision blong Council of Ministers long tuesday 29 okis 2017. Long sem COM ia, ol minista oli mandetem ministri blong faenens blong hemi sabmitim wanem oli kolem EXPRESSION OF INTREST blong kam memba blong AIIB.
COM, hemi agri tu long taem ia blong Vanuatu, hemi pem 25 share long AIIB. Folem decisen blong COM ia, ministri blong faenens hemi statem wok long hem be Vanuatu ino save pem share blong hem long las yia from we mani blong pem share, hemi mas karem apruvol blong parlamiant. Long end blong las yia nao, palaman, hemi apruvum mani blong gavman blong Vanuatu, hemi pem 5 share insaed long AIIB.
Wan share hemi 10 million vatu.
Vanuatu, hemi bin aplae blong hemi kam memba blong AIIB long septemba long 2017 mo long Novemba 2017, AIIB hemi akseptem aplikesen blong gavman blong Vanuatu. AIIB, hemi oferem blong Vanuatu, hemi pem wan share festaem be gavman, hemi disaed long yesterday blong hemi pemaut 5 share wantaem.
Decision blong gavman blong Vanuatu, hemi pem share long AIIB, hemi blong hemi explorem ol nara avenu long saed blong ol bank we oli ofarem wan reit we hemi lo apart long long olgeta traditional maltilaterol institusen olsem World Bank, Asian Development Bank mo International Monetary Fund.
Hed kota blong Bank ia, hemi stap long Beijing long China.