Vanuatu bae hemi sapotem aplikesen blong Japan blong hemi save hostem World Expo long 2025. Toktok ia Praem Minista Charlot Salwai, hemi talemaut tede long special envoy blong Japan long saed blong Expo 2025, Masaki Iwakura.
Praem minista Salwai i talem se bae igat ofisiol note yet igo long gavman blong Japan be Council of Ministers, hemi agri finis blong sapotem aplikesen blong Japan blong hostem Expo 2025.
Mr Salwai i talem se ikat ol nara kantri we oli sabmitim aplikesen blong olgeta blong hostem iven ia be Vanuatu, hemi disaed finis blong sapotem Japan.
Mr Salwai i talem se Vanuatu mo Japan, tufala ikat strong rilesensip mo tufala i fren kantri. Hemi talem se tufala i serem sem natural disasta olsem hetkuek, volkeno mo tsunami.
Praem minista i talem se Japan, hemi helpem Vanuatu tu long saed blong education, health, elektrisiti, aviation mo ol nara developmen sekta bagegen.