Praem minista Charlot Salwai, hemi saenem tede afternun, tasde 29 March 2018 wetem ambasada blong China long Vanuatu agrimen blong gavman blong China, hemi buildim niu haus blong President blong Republic blong Vanuatu, niu building blong ministri blong fainens mo extensen blong ministri blong foreign affairs.
Ambasada blong China i talem se trifala haus ia, oli important haus long Vanuatu mo gavman blong hem, hemi hapi blong givim mani blong olgeta.
Hemi talem se long 2 years taem bae Vanuatu, hemi selebretem 40 yia blong hem mo hemi important Vanuatu, hemi kat 3 niu haus ia. Ambasada blong China i talem se long yia ia, bae ikat opening blong wan bigfala projek we mani blong hem ikam long gavman blong China. Projek ia, hemi ol niu building blong Malapoa College. Hemi talem taem we wok, hemi finis, Malapoa College, hemi biggest education complex long region blong Saut Pacific.
Praem minista Salwai i talem tankiu long China from asistens blong hem blong buildim 3 projek ia. Hemi talem long ambasada blong China se gavman blong Vanuatu nao bae hemi agri long disaen blong 3 haus ia. Hemi talem se long ol yia we hemi pas, gavman blong Vanuatu ino tekem part blong disaenem ol projek blong ol dona kantri be naoia, gavman, hemi tekem desisen finis blong hem nao bae hemi agri long disaen bifo wok, hemi save gohet.
Mr Salwai i talem se gavman we hemi lidim tede bae hemi gohet blong mantenem strong mo gudfala rilesenship we hemi kat wetem gavman blong China.
Zone contenant les pièces jointes