Council of Ministers, COM hemi tekem decision tede mo diklerem immediate state of emergency long full aelan blong Ambae.
COM, hemi tekem decision tu blong gavman, hemi statem toktok wetem ol hae chief kastom blong aelan blong Maewo mo Pentecost blong fainem wan permanent graon blong muvum ol famili blong Ambae igo stap long hem.
Fes desisen blong COM folem ash fall, hemi blong diklerem disasta zone blong ol pipol blong Saut mo West Ambae mo blong muvum olgeta igo long ol seif ples long aelan blong Ambae yet.
Be wetem ol developmen long fiu de we i pas, hemi lukim asis blong volkeno tu, hemi fuldaon igo long Not blong Ambae long ol ples we sam famili blong Saut Ambae oli muv igo long hem. Ikat about ova 500 pipol blong Saut Ambae we oli bin muvum olgeta finis igo long Ist Ambae.
Long Lolosori vileij long Not Ambae, oli ripotem se asis, hemi mekem ol tri i fuldaon, ol haus mo hemi spolem tu ol klakae long karen.
Hemi damejem tu ol karem blong kava we hemi wan long olgeta main sos blong income blong pipol blong Ambae.