Chief blong Santo i welkam developmen we gavman i mekem long Santo

President blong RMC mo semtaem praem minista i kasem gud welkam long RMC regional komiti blong Luganville tede naet. Mr Salwai i dismisim ol toktok we lida blong opposition Ishmael Kalsakau ikam mekem long Luganville ino long taem. Mr Salwai i talem ol toktok blong hem i soem se hemi toktok blong wan pikinini. Mr Salwai i talem se Mr Kalsakau i soem klia se hemi no save histri blong UMP. Hemi talem se hemi agensem INCOME TAX be hemi no save long 2003 national congres blong Ifira i bin apruvum income tax. Hemi talem se Mr Kalsakau i agensem Luganville be hemi foget Santo hemi wan ekonomikol port blong Vanuatu. Mr Salwai i talem se Mr Kalsakau ino respektem ol MP blong Santo taem we hemi talem se oli ol pikinini. PM i talem se ol MP ia pipol i elektem olgeta mo oli ol lida long komuniti blong olgeta.