PM Salwai i handem ova computa long Batnapni, Melsisi mo Ranwadi skul

Praem Minista Charlot Salwai i handem ova long tede afternoon long Melsisi skul long sentrol Pentecost ol full set computa igo long Batnapni, Melsisi mo Ranwadi skul. Mr Salwai i talem se gavman tru long OCGIO bae hemi équipim evri skul raon long kantri long ol computer. Hemi talem se ol computa ikat insaed 10 tu 40 000 buk insaed. Mr Salwai i talem tede ius blong ol computa i important long éducation blong olgeta from we bae Oli save aksesem ol save we Oli neva aksesem bifo. Hemi askem ol pikinini blong trifala skul ia blong Oli mekem gud ius blong ol computa ia. Hemi talem se ikat ol nogud saed mo gud saed be Oli mas iusum gud saed blong hem. Mr Salwai i talem se igud se ol pikinini istat lanem long aelan mo taem Oli kam long Port Vila mo go long university, Oli familia wetem finis. Wetem network blong OCGIO long Vanuatu tede hemi mekem se ol pikinini mo ol titsa i save aksesem internet long skul blong olgeta. CIO blong OCGIO Gérard Metsan i askem ol pikinini mo ol titsa blong mekem gud ius mo lukautem gud ol computa ia.