Chief Arnabath: Tankiu long developmen we istap hapen

Paramount chief blong Not West Malekula, Chief Arnabath i talem tankiu long praem minista Charlot Salwai long ol developmen we istap kirap naoia long aelan blong Malekula mo ol nara aelan blong Vanuatu. Chief Arnabath i talem tankiu tu blong gavman i save diklerem disasta zone long eria blong hem wetem ol pipol blong hem long Not West Malekula afta long dameij blong saeklon Hola.
Toktok tankiu ia, chief Arnabath i talem long Mr Salwai wetem delegesen blong hem taem we oli kasem Unmet long naet long las tuesde.
"Olsem paramount chief blong community ia, mi tekem taem ia blong acknolejem bigfala tankiu long gavman blong declarem "disasta zone" long eria blong mifala afta long damej blong saeklon Hola. Bigfala tankiu tu long gavman from ol developmen we istap tekem ples long Vanuatu and speciali long Malekula we mifala i benefit bigwan long hem. Mi stap harem se kolta rod bae i kasem village blong mifala and mi luk se wok istap gohet sloslo osem survey i tekem ples stat long Lakatoro kasem long Unmet. Long behaf blong pipol blong Unmet mo Not West eria, mifala i wandem talem bigfala tankiu blong save konsiderem eria blong mifala hemi praeoriti afta long kolta rod we istap long hedkota blong mifala long Lakatoro. Tok tankiu igo long gavman from haedro pawa we mi luk wok istap gohet sloslo long hem naoia. Mi glad tumas long delegesen i save mekem visit long Not West Malekula". PM minista Salwai i talem long Chief Arnabath wetem ol pipol blong hem long Unmet se kolta rod bae hemi hemi kasem Unmet. Hemi talem se long novemba long yia bae hemi go saenem agrimen blong kolta rod, hemi stat long Lakatoro mo go kasem long Unmet.