Pm salwai mo Minista Norris i officioli laem daon fondasen blong dispensary

Praem minista Charlot Salwai mo minista blong health, Jack Norris, tufala offisioli leiem daon faondesen blong dispenseri blong Brenwe skul mo ol village we oli stap raon long tuesede last wik.
Mani blong dispenseri, hemi kasem 4 milien vatu mo gavman blong Vanuatu nao, bae hemi givim mani ia folem request blong ol chief mo pipol blong Brenwe igo long MP blong olgeta, Jerome Ludvaune. Dispenseri bae hemi mekem se ol pikinini blong skul mo pipol blong Brenwe bae oli save kasemtritmen long ples blong olgeta nomo. Naoia oli stap go long Aid Post blong Unmet o hospital long Norsup. Mr Salwai i talem se long ol bigman blong health olsem DG blong health se hemi no wandem lukim nalumlum i gru long ston. Hemi se hemi wandem lukim dispenseri hemi kirap long yia ia sapos ikat mani blong hem, hemi redi finis. Ol chief mo pipol blong Brenwe, oli talem se sins indipendens, hemi festaem we oli lukim wan praem minista wetem wan bigfala delegesen mo oli talem tankiu long fes visit blong Mr Salwai wetem dispenseri blong olgeta. PM Salwai i visitim eria blong Not West Malekula long las tuesde wetem minista blong health, minista blong education, Jean Pierre Nirua, ol DG mo ol bigman blong Malampa province.