Decision blong com about manaro volkenos

PM Charlot Salwai i talem se scientifik advais we ikam long gavman i soem se level blong volkeno istil stap long level 3 mekem se pipol blong Ambae ino save go bak yet long Ambae. Council of Minista hemi endosem long wik ia ol ting ting we ikam long ol hae chief blong Maewo. Hemi talem se quick décision blong COM hemi blong akuarem wan pis graon long Maewo blong oli save muv igo long hem blong wet long proses blong kastom adoption. Mr Salwai i talem se bae adoption long kastom blong Maewo bae hemi tekem taem from bae hemi dil wetem bigfala namba blong populesen. Ino festaem we Maewo i mekem kastom adoption. Hemi mekem finis wetem ol famili blong Banks we oli stap long Not mo olgeta blong Pentecost we oli stap long Saut Maewo. PM i talem tankiu long kindness blong ol chief blong Maewo mo pipol blong olgeta blong oli save risivim ol pipol blong Ambae. Mr Salwai i talem se COM i welkamem décision blong ol chief blong Santo mo talem tankiu long ol chief blong Santo blong oli save lukautem ol pipol blong Ambae. Hemi askem pipol blong Ambae blong oli patient mo oli wok tugeta wetem wetem gavman, ol chief mo pipol blong Maewo mo Santo. Hemi talem se COM i extendem state of Emmergency igo kasem 26 Novemba.