Praem minista Salwai i handem 300 000 vatu igo long komiti blong Tanna we istap ogaesem national yut camp blong katolik jioj raon long Vanuatu long yesterday sunday 9 disemba long Lowanatom katolik misen. Ples we camp istap gohet long hem. Camp bae hemi gohet wan wik.
Olsem Lida blong Kavman, mi praod blong save atendem Yut Camp ia tedei olsem Praem Minista mo semtaem wan memba blong Catholic Jios blong Vanuatu. Wan gathering olsem hemia i riflektem tru fridom blong yumi from yumi bin jusum long 1980 se bai yumi nao yumi save disaedem desitini blong yumi olsem wan pipol mo tu hao blong shapem bilif mo konsens blong yumi tru long moto blong yumi we hemi talem “Long God Yumi Stanap’’ we hemi wan stetmen we onli a few kaontri long wol oli save acknowledgem. Yumi bin diklerem tru long Preamble blong konstitusen se establismen blong united, fri Ripablik blong Vanuatu hemi stanap long tredisinol Melanesian value, faith long God mo ol Christian prinsipol.
So Gathering ia hemi impotent from tufala risen ia:
1. Hemi riflektem Impoten rol blong jios blong save upholdem fridom blong konsens we hemi wan raet we yumi olsem wan nesen I no bin kat antil indipendens long 1980 mo hemi wan raet we yumi mas difendem olsem wan fri mo indeipendent kaontri. Longtaem I kam, jios nao I bin bikfala institusen we hemi bin stap provaedem seves deliveri mo jios tu hemi bin pleim bikfala rol long fridom blong yumi.
Kavman we mi lidim tudei hemi jes lonsem long last yia wan plan we yufala evriwan I bin tekem pat long konsaltesen blong hem we yumi kolem Nasonal Sasteinebol Divelopment Plan. Insaed long plan ia, kavman hemi luk save impoten rol blong jios mo hemi aotlaenem long polisi daerektif blong sosaeti pila 1.5, Nid blong mas strengthenem rol blong jios blong kontinue blong sapotem ol komuniti seves from starkja blong jios hemi ko daon kasem level blong komiuniti mo evri eria oli kat wan jios finis.
Hemia kavman blong mi hemi stap wok finis blong divelopem polisi blong NGO we hemi shud provaedem wan fremwok blong save aloem kavman blong save wok mo klosap wetem ol jios or komiuniti based okanaesesen long seves deliveri.
2. Nambatu poen we gathering ia hemi impoten from hemi from se hemi wan gatering blong ol yangfala. Vanuatu tudei hemi wan yutful kaontri we I minim se kaontri ia, majority blong hem or 68% blong populesen nao hemi ol yangfala anda long 30 yia. Wan narafala wei blong lukluk long hem, sapos Vanuatu hemi wan haos we I kat 10 pipol insaed, 6 long ol pipol ia hemi ol yut we yumi defaenem long Nasonal Yut polisi blong yumi hemi olgeta we age blong olgeta I stat long 12 ko kasem 30 yia.
So sapos yumi tekem ol pikinini we age blong olgeta hemi 0 to 11 yia, afta ol yut we hemi 12 to 30 yia, kaontri ia hemi medap long ol yangfala. Long wan wei, hemia hemi prisentem wan polisi jalens long wan pua kaontri olsem Vanuatu from naoia, insaed long haos ia we I kat 10 pipol, at lis 3 nao oli stap wok blong sapotem 7 pipol. 1 long ol 7 pipol ia hemi olfala we I nomo save wok, wael jalens blong kavman, hemi hao blong divelopem potensel blong narafala 6 ia.
Polisi blong kavman hemi blong provaedem 100% edukesen blong sapotem olgeta. Sapos yu luk insaed long niufala polisi daereksen blong kavman, long bifo I kam, edukesen hemi olsem wan prodakt we qualifikesen o pepa blong yu nao bai yu save eksjensem blong karem wan wok.
Bai yumi talem se hemi bes long wan strategi blong ‘’survival blong the fittest’’-yu strong yu win. Be hemi no bin mesarem ol difren level blong inteligens mo krietiviti, mekem se yumi no bin divelopem stret potensel humen risos blong Vanuatu.
Tudei kavman we mi lidim hemi bes long tingting se edukesen hemi wan human raet. Evri pikinini, no mata long wanem parents oli kat, o wanem aelan oli kam long hem, o weta oli boe o gel, oli kat raet blong mas kasem edukesen we hemi quality mo I ikual mo fea long evriwan.
Hemia I stap long Sosieti pila 2 we hemi olso tokbaot nid blong mas kat ol difren patway, we I save aloem pikinini blong isave jusum wanem we oli wantem mekem, bes long ability blong olgeta we I no restricted long system blong yumi. Kavman blong mi I wantem stopem dropaot long skul mo tu stopem hao system hemi stap westem human risos potensel blong hem.
So wetem bikfala plan we yumi kat, Kavman hemi stap divelopem tu wan Human risos development plan blong yumi save identifem ol skils mo employment gaps we I stap blong save adresem gud.
As yufala I stap long wik ia blong diskasem bikfala tingting we hemi “Nous Sommes tous Evangelisateurs” o “ Yumi everiwan ol Evangelist”, mi wantem blong lego wan enkarejment mo jalens wetem yufala, olsem Praem Minista blong wan kaontri, we hemi diklerem se hemi stanap long God.
Kavman, jios mo nakamal oli provaedem ol value, bilif mo sapot we hemi divelopem identity blong yumi, olsem wan pipol mo blong yufala I save divelopem potensel blong yufala blong kontribiut blong bildim nesen blong yumi, be rol blong sekiurum wan gudfala sasteinebol fiutja blong Vanuatu, hemi stap long han blong yufala and espesili nao yufala ol yut blong jios:
Long Buk blong Joel japta 2 ves 28 mo Acts Japta 2 ves 17 Holi toktok blong God hemi talem olsem se, Bai taem I stap kam we bai mi pourem spirit blong mi long everi wan: ol son mo ol daughter blong yufala bai oli profesai, ol olfala bai oli luk ol drim mo ol yangfala bai oli luk visen” Proverbs 29 ves 18 hemi talem olsem se sapos I no kat visen, bai ol pipol oli perish.
Nasonal wik blong yut Camp ia hemi kam long raet taem as Kavman hemi stap lukluk long jalens blong human risos, be jalens blong jadjment blong God, long yumi olsem wan nesen, we yumi diklerem yumi olsem wan Christian Kaontri, I stap long hand blong yufala ol yut blong jios.
Disasta we bai hemi afektem yumi sapos ol pipol oli no divelopem stret potensel blong olgeta o oli wanda away from God, hemi stap nao long yumi ol yangafala lida, we yu bin fanreis blong pem ship blong yu o blong regista blong kam long ples ia tudei.
Tankiu blong step ap long lidasip jalens blong kat visen blong apholdem prinsipol blong indipendens, fridom mo development.
Mo mi finis wetem wan mo ves long Baebol
“Jeremiah 1:5: “Bifo mi fomem yu insaed long womb long mama blong yu, mi save yu finis mo mi saetem yu apat, mo mi apoentem yu finis olsem wan profet (o wan evangelist, wan lida ) insaed long nesen”.
Nesen ia hemi wan nesen blong ol yangafala, yumi nidim ol gudfala rol model yut lida blong tekem lid. Tudei mi praod se I kat 1,000 yut lida long ples ia. Bai kavman blong mi hemi wok wetem yufala tru long Yut Ministri mo Nasonal Yut kaonsel olsem ol patna insaed long development, dimokrasi mo nesen bilding.
Wetem toktok ia, mi wantem Diklerem Nasonal Yut Camp blong Katolik Jios long Lowanatom, West Tanna long Tafea province wetem tingting blong “Yumi Evriwan ol Evangelist”, hemi ofisali Open!
God i blessem yufala everiwan!
Thank yu long attention blong yufala.