Memba blong palaman blong Port Vila, Jean Pierre Nirua hemi minister blong education yet.
Folem ol political even we i tekem ples long las wik we hemi lid igo long motion of no confidence agensem Prime Minister, Charlot Salwai, Mr Nirua, hemi bin mekem wan ofa igo long Mr Salwai blong risaen long position blong hem olsem minister blong education. Ofa blong Mr Nirua ia, Mr Salwai i bin acceptem verbally be ino kat any resignation leta we i bin signed long las fraede.
Ofa ia, Mr Nirua, hemi mekem folem dimand blong Vanuaku Party blong kat sam moa ministerial portfolio. Ofa ia, Mr Nirua, hemi mekem igo long Mr Salwai long Fraede sava. Long sarere, Mr Salwai hemi terminetem deputy praem minister mo semtaem minister blong trade, Bob Laughman mo minister blong agriculture, Osea Nevu mo tekem Lidas Party ikam insaed long gavman mo givim 2 ministry long olgeta. Termination blong VP long gavman long sarere, hemi mekem se inomo gat demand blong more ministry mo Mr Nirua, hemi nomo officially risaen.
Follem ol toktok we istap kamaut long social se Mr Nirua, hemi risaen, ofis blong Prime Minister, i wandem mekem save se Mr Nirua, hemi minister blong education yet. Mr Nirua i neva saenem resignation leta mo Mr Salwai i neva kasem wan resignation leta ikam long Mr Nirua.