Long 2015, natonton we yu luk long foto ia, hemi bin wan sid blong hem nomo. Afta we mi spendem ova long 10 yia blong stap long bigfala naes vileij blong Vanuatu we hemi Mele, mi bin disaed blong planem sam tri blong traem protektem franis skul long taem blong rabis weda mo level blong solwota, bae hemi kam antap. Ova long 20 tri mo 10 natonton we mi planem long bits mo smol riva long franis skul blong Mele, saeklon Pam, hemi bin barem olgeta evriwan be ikat 2 natonton nomo, tufala i maneij blong gru afta long saeklon Pam. Mi visitim tufala natonton ia long sande 13 Okis mo mi hapi blong luk se tufala i gru bitim 4 mita finis. Tufala i mekem flaoa finis mo ikat klosap long 100 smosmol natonton bagegen i gru andanit. Ino bin kat natonton long smol sos blong wota ia mo wan pul we istap long sos blong hem be wetem tufala natonton ia, mi kat hop se ol fis fis maltaplae moa mo bae oli fainem wan ples blong hait long hem. Smol sos blong riva ia mo pul i hait lelebet long bush klosap long franis skul blong Mele be taem hemi ren bigwan, hemi ron aut ikam kasem solwota. Smol pul ia, hemi veri rich long saed blong fish mo ol wael taktak. Ol fish ia wetem ol wael taktak ia, future blong olgeta ino klia folem developmen we istap kirap klosap mo pipol we istap go plande long eria ia.
Tufala natonton ia i pat tu mo istap tu insaed long wan dokumentri film we Thalassa i prodiusim blong soem long taem blong COP 21 long Paris. Taem ia tufala i bin sam sentimeta nomo be tede tufala i gru mita.