Narua: Viktim blong political biliv

Sapos ol machine ino brokdaon mo ino rain, rod blong we lingkim not igo saut Pentecost we i pas tru long bigfala village blong Narua long sentrol Pentecost i should finis bifo manis julae long yia ia hemi finis. Long Narua village ikat ova long 500 pipol oli liv long hem. Hemi wan strong hol blong Nagriamel just afta long indipendence long 1980. Hemi long ol village we hemi givim 2 pikinini gel igo long lida blong Nagriamel, chief Moli Jimmy Steven. Long taem blong rebellion, militri force i bin arrestem fulap man long village. Oli pipol blong village ia oli buliv strong se from political biliv blong olgeta ia i mekem se kam kasem tede sevis blong gavman olsem rod ino kasem olgeta. Ikat rod gavman i mekem long yia 80s we hemi lingkim not mo saut be rod ia i luk se hemi frait long bigfala village ia. From Nokonkulkul igo kasem Narua hemi just ova wan kilomita. Nokonkulkul ia rod we gavman i mekem blong joenem not mo saut Pentecost, rod i pas tru long igo Utjunmwel, Ena mo Batnapni. Ol man not Pentecost taem oli wandem go long saut oli aut long solwota long not, oli go bush, oli go bagegen long Batnapni igo bagegen long bush kasem Nokokul ale go bagegen long solwota long Melsisi mo just folem solwota igo kasem Lonorore. Hemi very costly be niu rod we bae bae hemi pas tru long Narua, hemi sotkatem distens mo praes blong transport. Political biliv blong pipol blong Narua i mekem se rod blong trak we gavman i should mekem igo long olgeta ino kat kasem tede. Ikat wan rod we buldos blong catholik misen i mekem igo long olgeta. Rod hemi sevesem olgeta for samtaem nomo afta hemi kam no gud kasem tede. Naoia hemi very hard blong trak i kasem olgeta. Long taem blong san sam trak nomo i save kasem Narua. Tede Narua wan long main main village blong saplaem kava long local maket, regional mo international.