Praem Minista Charlot Salwai i askem ol man blong politik blong no politisaisem yusum safaring blong ol pipol we saeklon Hola i afektem.olgeta blong mekem politikol propaganda blong olgeta. Mr Salwai i talem se gavman, hemi kat fasin blong wok blong dil wetem wan disasta. Praem minista i talem se visit blong wan MP i kam long Pentecost just afta long saeklon Hola hemi mekem olsem se ino kat gavman. Hemi talem se i no gud blong yumi safaring blong ol pipol blong mekem politik long hem. Praem minista i talem se long kastom blong Pentecost taem we i kat ded pipol i serem sori be i no taem blong mekem politikol propaganda from 2020 general eleksen. Mr Salwai i talem se taem we gud taem i gud blong visitim aelan be ino long taem blong safaring nomo. Praem minista i talem se gavman i kat fasinblong wok we hemi chanel tru long NDMO..Hemi talem se any assistens blong ol dona kantri bae hemi.pas tru long NDMO be ino long ol man blong politik. Praem.minista i talem se sem toktok blong abiusim safaring blong ol pilol hemi bin mekem finis long taem blong ertuption blong Manaro volkeno. Praem minista i talem se fasin we hemi hapen long taem blong saeklon Pam we i lukim i kam miss-use blong assistens blong ol dona kantri. PM Salwai i talem se investigesen blong rilif saplae blong Pam i stap gohet. Hemi talem se ol dona kantri i helpem Vanuatu long gud heart mo hemi no stret blong ol man blong politik i go miss-usim. Hemi talem long ol pipol blong saut Pentecost se visit blong hem wetem minista blong climate change Ham Lini i kam long Pentecost hemi blong assurem pipol se gavman bae hemi helpem pipol we Hola i afektem olgeta. Praem Minista i talem se i kat erial  assesmen finis mo i kat ol man blong gavman bae oli pas bagegen. Ol chiefs blong saut Pentecost oli talem tankiu long praem minista mo Mr Lini blong save visitim olgeta. Long saut Pentecost long Pangi eria mo long Melsisi long sentrol Pentecost pipol i talem se oli risivim woning leit. Long Melsisi sam.pipol i talem oli kasem woning 3 be woning wan mo 2 oli no kasem. Oli talem se taem oli kasem woning 3 be Hola i stap wip finis. Long sentrol Pentecost wan man i lusum laef blong hem afta we wan stamba blong blak palm hemi fuldaon long hem.

    Batnapni Junior Secondary School i petionem Prime Minister Charlot Salwai yesterday taem we hem mo Minista blong climate change Ham Lini tufala i visiitim skul ia.Ol igivim wan mat long Mr Salwai mo minista blong education, Jean Pierre Nirua. Ol i wandem se skul ia i kasem yia 13. Oli stap buildim wan stori klasrum tu mo oli wandem gavmani help long hem. Mr Salwai i risivim red mat blong hem mo blong Mr Nirua.

    Praem Minista Charlot Salwai mo minista blong climate change Ham Lini tufala i visitim mo toktok long ol parens, ol teachers mo ol pikinini blong Melsisi Junior Secondary skul long tede moning. Melsisi skul dameij long saed blong ples blong slip blong ol boe mo gel wetem sam klasrum. Saeklon Hola hemi bin bloem aut ol luva mekem i go insaed. Warden blong ol pikinini i talem se naoia taem we hemi ren dometri hemi fulap gud long wota. Tufala dometri ol missinari oli buildim bifo indipendens blong Vanuatu long 1980. Mr Salwai i talem se sam building blong Melsisi mo.Ranwadi skul hemi bin dameij finis long taem blong saeklon Pam mo saeklon Hola i kam dameijem bagegen. Mr Salwai i talem se Vanuatu i blong lukluk bak long polisi blong hem we hemi dil wetem natural disasta from bae moa and moa baeikatol natural disasta. 
    Mr Salwai i askem pipol blong ting ting hevi long ol woning.

    Praem Minista Charlot Salwai mo minista blong climate change Ham Lini tufala tufala i kasem Ranwani long 2 klok tede afternoon blong toktok long teacher mo student,Ranwadi High School i wan long olgetas kul we hola i damejem sam klasrum blong hem. Mr Salwai i kat social media be gavman be gavman hemi fasin blong wok mo bae hemi no rilae long social media mo sam praevet pipol we oli kam wokbaut long aelan. Hemi talem long ol studen se weda we i stap hemi part blong climate.Mr Salwai i askem ol studen blong stadi moa abaut climate. Hemi presem ol studen mo teacher from oli resilien. Hemi talem se hemi hapi blong luk ol studen i klinim skul blong olgeta. Mr Salwai i talem se pentecost i wan aelan we hemi kat plande trak mo hemi isi nomo blong karem senso mo kliarem rod. Tede moning sam tri i blokem sam pat blong rod stat long Lonorore airport. Praem Minista i talem long namba 16 March bae i kat wan tim blong NDMO bae oli kam wokbaut long graon. Hemi askem ol pipol blong Pentecost blong oli moa resilien be no dipen tumas long rais. Hemi talem se tede pipol i kasem sik taem we oli kakae rais mo i kat rikod blong sik blong kakae long hospital. Praem minista i talem se pipol blong Pentecost i mas adaptem olgeta wetem climate change blong tede. Hemi askem ol studen mo pipol blong Pentecost blong kakae festaem kakae we i stap yet long graon blong wait long NDMO blong kam lukluk wanem nao i rili nidim blong gavman hemi asist long hem. Mr Salwai i askem pipol blong ting ting hevi long ol woning. Hemi talem se long eria blong sentrol i kat isi akses long infomesen. Mr Salwai i talem 4G blong digicel mo 4GPLUS blong TVL ino blong lesin nomo long musik be pipoli mas ting ting hevi long ol woning. Central Pentecost i wan long eria we hemi rikodem wan ded long taem blong saeklon Hola. Praem Minista i askem ol studen blong Ranwadi blong ting ting hevi long stadi blong olgeta. Hemi kongratulem ol studen blong oli save selektem olgeta blong stadi long Ranwadi.

    Praem minista Charlot Salwai mo minista blong climate change Ham Linitufala i kasem constituency blong tufala long Pentecost tede blong lukluk long dameij blong saeklon Hola. Tede tufala i visitim mo toktok long ol pipol stat long Ranwadi High shool i go kasem long Batnapni.
    Mr Salwai i visitim dameij blong Hola wetem.DG blong climate change, Jesse Benjamin mo darekta blong NDMO.Bae tufala i kasem bak Port Vila long tumoro. Afta long Pentecost bae MrSalwai i visitim dameij blong Hola long Malekula mo Santo.

    Foma presiden blong RMC long aelan blong Pentecost, Jean Baptiste Buleben, hemi askem  lida blong opposition, Ishmael Kalsakau mo memba blong palaman blong Pentecost Francois Chani blong tufala i mas honest long ol pipol blong Vanuatu long ol toktok blong tufala.
    Mr Buleben i talem se Mr Kalsakau mo ol nara MP blong opposisen, oli agensem inkris blong salari blong olgeta we gavman i pem salari blong olgeta be bihaen long hem, oli benefit long inkris ia. Hemi talem se inogud opposisen istap mekem big maut long inkris blong salari long pablik be bihaen ol memba blong palaman blong opposisen, oli pas bihaen mo go karem mani inkris ia. Mr Buleben i talem se sapos Mr Kalsakau, hemi wan tru lida mo hemi honest long ol toktok blong hem agensem inkris ia, hem sut givim bak inkris o difrens blong salari blong hem long tede mo hemia blong bifo igo bak long gavman tresori long ministri blong fainens. Mr Buleben i talem se hemia i fasin blong wan hypocrite. Hemi talem se Mr Kalsakau wetem grup blong hem oli agensem inkris ia  be bihaen long hem, oli go akseptem mani we gavman i givim long olgeta long evri pay-day. Mr Buleben i askem Mr Kalsakau blong hemi folem tok tok blong hem be hemi no tok tok nomo ale fasin blong hem, hemi go difren. Hemi apil long Mr Kalsakau blong hemi sapotem ting ting blong introdiusim INCOME TAX blong pem salari blong hem. Hemi talem se hemi semak olsem PACER PLUS we Mr Kalsakau i tok agensem insaed long palaman be tede pipol we oli vot long hem long constituency blong Port Vila, oli benefit long RSE scheme long Australia mo New Zealand.  Hemi se hemi sapraes se ino long taem Mr Kalsakau, hemi dimandem blong gavman hemi apoentem hariap wam leba commissioner blong luk luk long ol RSE workers. Mr Buleben i askem Mr Kalsakau blong hemi shout shame blong tokbaut RSE scheme taem we hemi agensem PACER PLUS. Hemi talem se ol pipol blong Vanuatu we oli go wok wok long RSE sheme oli go long Australia mo New Zealand mo tufala kantri ia nao we Vanuatu i saenem agrimen blong PACER PLUS wetem tufala. Mr Buleben, hemi apil tu long memba blong palaman blong Pentecost, Mr Chani blong hemi mas kamaut klia long isiu blong PACER PLUS. Foma presiden blong RMC long Pentecost i talem se Mr Chani i agensem PACER PLUS be tede hemi sendem ol pipol blong Vanuatu igo wok long Australia. Hemi talem se taem we Mr Chani i toktok wetem ol bisnis friend blong hem long Port Vila, hemi agensem PACER PLUS be long konstituensi blong hem long Pentecost, hemi akseptem PACER PLUS. 
    Mr Buleben, hemi rimaenem Mr Kalsakau mo Mr Chani se sapos Vanuatu ino saenem PACER PLUS, bae hemi no part blong raon table negotiation between Australia mo New Zealand blong tokbaut RSE sheme. Hemi talem se taem we Vanuatu ino save part blong raon table negotiation hemi minim se Vanuatu, bae hemi nomo save sendem ol pipol blong Vanuatu igo long Australia mo New Zealand. Mr Buleben i talem se nara big project we bae hemi save benefitim ol pipol blong Vanuatu, hemi project blong rebuildim bak Christ Church long New Zealand. 

    Praem Minista Charlot  Salwai, hemi wandem lukim tede moa developmen blong prodaktif sekta. From risen ia long las manis, hemi visitim ova 5 000 hekta projek blong noni long Velit Bay long aelan blong Santo mo long sarere namba 3 March, hemi visitim nara noni plantesen blong Mr Joseph Jacobe long Rentabao long aelan blong Efate. Noni, hemi niu prodak we hemi save kam wan nara sos blong pipol blong Vanuatu, hemi save mekem mani apart long ol traditional crop mo prodak olsem koprah, kakao, kava mo kofi. Noni tri, hemi putum wan yia nomo mo man i save havestem. Oli estimetem se wan noni tri, hemi save mekem 6 000 vatu mo man i save havestem 4 taem long wan yia. Insaed long wan hekta, man i save planem 1 000 stamba blong noni we hemi save mekem about 24 milien vatu long wan yia. Mr Salwai i talem se taem yu komperem noni wetem kava, kokonas mo kakao, hemi putum ova long 5 yia blong man i save stat blong winim vatu long hem. Praem Minista i talem se wan gudsaet blong noni komperem long ol nara traditional prodak ia se hemi kat faktri blong hem long Vanuatu mo hemi kat maket blong hem long ol nara kantri. Hemi talem se kava we fulap pipol, oli resis from tede, hemi no kat faktri yet long Vanuatu mo hemi no kat maket olsem noni. Noni tede, hemi intarem finis maket blong China we ikat ova long wan bilien populesen.  Long wan plastik botel blong 600 ml, praes blong hem long China tede, hemi ova long 6 000 vatu. 
     
    Mr Salwai i talem se prodaktif sekta, hemi save mekem se Vanuatu i save kat moa sos blong income mo mekem moa mani. Mr Salwai i inkarejem lokol pipol blong produce moa blong save winim vatu mo blong fitim olgeta bagegen. Hemi talem se Vanuatu i nidim wan healthy nation blong hemi save karemaut developmen blong hem mo kamaut long ol non komunikebol disis olsem sik blong suka.

     

    Ino long taem i pas Mr Salwai i bin kolem ol big big man blong pablik we oli stap long Port Vila mo olgeta we oli stap long ol aelan ikam long ofis blong hem mo askem olgeta blong oli luk luk bak long praeoriti blong olgeta long saed blong rod. Hemi talem se long olgeta se oli no save disasosietem prodaktif sekta wetem infrastructure olsem rod blong trak. Mr Salwai talem se wetem wok we pablik wok istap mekem tede blong stap mantenem rod nomo, hemi no save mekem se pipol blong Vanuatu oli save kat moa mani. Hemi askem pablik wok blong oli luk luk bak long kraeteria polisi blong olgeta. Hemi talem se fasin blong stap mantenem sem rod nomo mo mekem rod igo long ples we ikat hae populesen long hem, hemi no benefitim ekonomik developmen blong Vanuatu. Hemi talem askem pablik wok blong oli jenisim kraeteria blong olgeta mo tagetem moa ol ples long ol aelan we oli save produce moa mo oli save produce yet be oli no save mekem from we oli no kat akses long rod. Hemi givim eksampol blong rod we igo long Saut Santo, Saut Malekula, Not West Malekula mo aelan blong Erromango. Hemi talem se tede praes blong kava, hemi go antap tumas from pipol blong Pentecost we oli main saplaea long lokol, regional mo international maket, oli stap planem kava nomo long coastal eria mo ples ikam smol be ikat bigfala bush istap be ino kat rod blong trak. Mr Salwai i talem se sapos pablik wok i jenisim polisi kraeteria blong hem, bae hemi save helpem prodaktif sekta blong Vanuatu blong gru moa.

    Praem Minista Charlot Salwai, hemi handem ova long tede, monday namba 5 March 2018, wan bus igo long Malfatumauri National Kansel blong ol chief. Mr Salwai i talem se help blong gavman ia, hemi folem rikues blong presiden blong Malfatumauri igo long fleet committee we hemi stap long pablik sevis commission. Pablik sevis commission, hemi stap anda long ofis blong praem minista.
    Hemi kongratuletem presiden blong national kansel blong ol chief long kontribusen blong olgeta blong holem taet pis mo uniti blong pipol blong Vanuatu. Mr Salwai i talem se tede ol kastom chief oli kontribiut bigwan long wok blong mantenem lo mo oda. Hemi talem se long sam eria we gavman ino save mekem wok long hem, ol chief oli stap blong mekem wok.
    Presiden blong Malfatumauri, chief Tirsupe i talem tankiu long gavman from donation ia. Hemi talem se hem nao i bin askem bus ia long gavman folem nid we ofis blong hem, hemi kat. Hemi talem se kasem tede, hem wetem ol staf blong hem, oli yusim wan trak nomo. Chief i talem se bus, hemi blong ol staf oli iusim long saed blong administration. Hemi talem se bus ia, bae hemi helpem bigwan ol staf long administresen blong oli save mekem gud wok blong olgeta. Bae hemi help bigwan tu blong stap karem ol chief we oli memba blong Malfatumauri long taem blong bigfala miting blong olgeta. Long sem de ia, presiden blong Malfatumauri, hemi givim kastom tamtam blong aelan blong Embrym igo long Praem Minista Salwai blong talem se oli hapi bigwan long bus ia.
    Bus ia, hemi wan long olgeta we gavman blong China, hemi bin handem ova ikam long gavman blong Vanuatu blong oli iusim long taem blong las saut pacific mini gem long Port Vila. Handing ova we Mr Salwai hemi mekem long tede, hemi blong makem national de blong ol chief raon long kantri. National de blong ol kastom chief blong Vanuatu long Port Vila, hemi lukim President blong Ripablik blong Vanuatu, Pastor Obed Moses Tallis, memba blong palaman blong Port Vila, Ralph Regenvanu, tufala tu i bin joenem selebresen.  De ia, hemi lukim ol pipol we oli go long selebresen, oli kakae lokol kakae we pipol blong Mangaliliu long not Efate, oli bin priperem. Ikat tu ol tanis kastom we i kamaut long ol difren komuiniti blong Port Vila mo ol studen blong Lycee Louis Antoine de Boungainville.
     

     

    Praem Minista Charlot Salwai, hemi handem ova long lunch ia, Tuesday 27 February, wan check blong 1.2 million vatu igo national tim blong beach volley blong Vanuatu tede.
    Mr Salwai we hemi semtaem patron blong beach voley blong Vanuatu, hemi talem se hemi trastem ol boy mo gel blong Vanuatu se oli save winim medal long taem blong Commonwealth gem long Gold Coast long Australia long manis April 2018. Hemi wishim tim blong Vanuatu sakses.
    President blong Vanuatu Volleyball Federation, Debbie Masauvakalo i talem tankiu long Praem Minista Salwai mo gavman blong save sapotem tim blong beach volley. 
    Misis Masauvakalo i talem tankiu long Mr Salwai long sapot blong hem long las mini gem we hemi mekem se Vanuatu i save winim gold medal.
    Hemi talem se Vanuatu i neva winim medal long Commonwealth gem be hemia long nekis manis, Vanuatu, hemi kat bigfala hop blong go kasem semi final mo final.
    Hemi invaetem Mr Salwai blong go long las trening blong olgeta long namba 1 April bifo tim hemi liv blong go long Australia. Misis Masauvakalo i talem se mani ia bae oli yusum blong trening preparation blong tim blong Vanuatu from Commonwealth gem ia.
    Mani ia, hemi blong sapotem head coach, Shanan Zunker blong Australia blong hemi gohet blong trenem tim blong Vanuatu. Head coach ia, bae hemi kasem Port Vila long 13 March blong gohet blong trenem Vanuatu tim.
    Commonwealth gem bae hemi stat long 4 kasem 15 April long Gold Coast long Australia.

    Tedei hemi wan veri veri importen mo historikol day blong yumi everiwan, espesali long pipol mo Kafman blong Vanuatu wetem pipol mo jif blong Ifira Tenuku. Yumi stap ia tedei sem taem tu yumi save sensem  mo lukim happiness we istap long fored blong yumi everiwan ia taem we yumi enter long Operesen Terminal ia blong witnessem mo gat dekleresen se terminal ia hemi startem full operesen blong hem blong work wetem ol international shipping agencies mo operators. Tedei yumi kam blong witnessem importen okesen blong talem ol storian long taem we tinting mo toktok blong bigfala importen infrastrakja ia isave kam about. Olgeta taem mo fasin blong yumi wokabaot blong save ajifim tingting ia mo save gat gudfala risal ikam aot long hem bambae isave gat ol janens. Ol wokabaot mo storian ia nao itekem yumi kam kasem tedei we yumi save lukim se tingting we samfala blong yumi ibinstap talem long taem ia we Teriki paunimanu Mantoi Kalsakau III mo ol teknikel team blong hem istartem Storian wetem Kafman blong yumi tugeta isve startem wokabaot. Itru nomo bae samfala man bae oli save talem smolsmol se Hemia hemi wan Drim nomo ia, and tedei yumi kam blong witnesem se drim ia hemi kam tru. Mo tedei mi gat honour ia blong save kam forward olsem present Prime Minister blong talem se Hemi drim kam tru blong umi. Mi gat honour ia blong konkratuletem Paramount Jif wetem ol past kafman ikam kasem mi tedei blong mentenem polisi mo development stan ia istrong istap.

    Mo wetem respect ia mi wantem askem yumi everiwan blong save stanap mo kivim wan minit saelen blong rekonaesem ol effort blong ol leaders mo fren blong yumi we oli bin work hard tru be tedei oli no save stap wetem yumi.  Olsem Late Honorable Edward Natapei, late Site Engineer blong Project Mr. Simoji  we hemi representem ECOH Corporation blong supervisem ol konstraksen mot u ol family members we yumi no talemaot names blong olgeta.   - (UMI STANAP BLONG SILENCE) - 

    Tankio tumas long everiwan

    Tedei taem we mi stap bae mi save rikol long ol exciting mo frendli atmosphere we istap long ples we yumi stap long hem tedei bambae mi save talem se okesen blong tedei hemi markem ating namba four mo final stej blong ol special events olsem we bae hemi Offisel Opening Seremoni long new infrastrakja olsem. Bigfala ajifmen nao tru long leadership blong yu Teriki Paunimanu Mantoi Kalsakau III long leadership mo Visen we yu gat tuwords improvmen long komiunity blong you blong tekem wetem ol past kafman kasem tedei.

    Long sem taem tu mi wantem acknolejem bigfala support mo assistance blong Kafman mo Pipol blong Japan we istap givim long Vanuatu. Bae mi save talem tu se hemi historical from we hemi also first taem we Vanuatu hemi ever kat assistens tru long wan ODA Loan blong Japan. Mi wantem yumi givim bigfala han blong talem tankio igo long kafman mo pipol blong Japan from se sipos no bae yumi neva save gat State of the Art facility olsem. Tankio tumas long Kafman blong Japan mo tu Kafman blong Australia tru long DEFAT we ibin mekem wan komprehensif Bankable Fisabiliti Stadi we igivim assurens long kafman blong Japan blong save fundem projek ia.

    Ol wokbaot, storian mo proses blong realisem projek ia tu hemi no isi mo hemi tekem sam taem. Ol storian mo wokbaot ia hemi also kam abaot followem stampa tingting blong kafman we istap long first Priority Aksen Plan blong Kafman long period 2006 kasem 2018.

     Tingting ia nao Kafman long taem ia hemi startem inisiatif mo belif long Paplik Praevet Partnasip (PPP). Wetem inisiatif ia kafman blong Vanuatu hemi stanap long hem mo tekem wan different approj we may be hemi no semak long tingting blong World Bank or any financial institutions bae istap usem. Hemia yumi praod blong talem tu se inisiatif ia hemi gat plante context blong Vanuatu Long hem.

     Mi glad blong talem se kafman blong Japan iluk save priority nid blong Kafman blong yumi mo pipol blong Vanuatu blong save growem ekomimi blong yumi hemi kam blong agri wetem Vanuatu mo grantem first part blong ODA Loan.

     Negosieson blong ODA Loan ia hemi bin tekem ples bitwin ol teknikal tim blong yumi long side blong Kafman wetem representative blong high offisel blong JICA bak long April 2012 and nekosiesen hemi saksesful wetem agrimen blong loan we amount ikasem kolosap 5 billion vatu.

     After we ol agrimen blong ODA Loan hemi reached bitwin tugeta kafman blong  Japan mo Vanuatu long August 2012 hemi lid  igo long taem we yumi everiwan ibin stap witnessem offisel Launching we hemi tekem ples long same ples we yumi stap long hem tedei blong projek hemi kik srart. Mo hemi bin witnessed by then President blong JICA, Dr. Akihiko Tanaka mo hemi bin gat honour blong declarem se Port Vila Lapetasi Multi-Purpose Wharf Development Project hemi Offisel Launching long namba 5 May 2015.  

    Ol engineering study mo design hemi go hed mo taem we mein konstraksen hemi blong start yumi kam bakeken long ples ia blong witnessem Ground Breaking blong shoem se Project ia we yumi stap tokbaot bae hemi start nao. Mo Ground Breaking hemi bin tekem ples long namba 4 August 2015.

     Long taem ia Kafman blong Vanuatu hemi bin gat andastanding se ODA Loan financing ia hemi streit blong tekem yumi kasem taem we project hemi komplit wantaem, but nomo Enjinia detail mo teknikal disaen hemi shoem se bae hemi ninim addisonal fund we ikasem kolosap 5 billion bakeken blong project isave komplit gud everiwaqn.

     Kafman blong Japan hemi konsiderem seriously mo semtaem luk save Priority nid blong Kafman mo pipol blong Vanuatu nao hemi apprufem additional funding ia long wan short period long time from se nid ia hemi important tumas wetem teknikol disaen we Engineer igivim blong justifaem inkris ia wetem namba 2 loan blong 5 billion vatu we hemi mekem total Loan ia hemi kasem kolosap 10 billion vatu long total.

     Wetem bigfala support we Kafman blong Japan istap givim ikam long Vanuatu program Oversease Development Assistance blong hem tu istap kam antap plante long Vanuatu. Imekem se tingting blong setemap wan Embassy blong Japan long Vanuatu, Kafman hemi supportem full wan, mi repeat Kafman isaportem full wan. Hemia istap shoem wan gudfala relesonship we yumi gat mo olsem Prime Minister blong tedei mi stap look forward blong welkam long niufala Ambassador to Vanuatu any time nao blong fosterem more stronger relesonship mo kat gudfala mo long teknikal mo political korporesen.

     Long tedei tu wetem presence long ol traditional mo long taem Development partna blong yumi mo ol Multi-lateral Finansial institutions blong yumi se Kafman blong Vanuatu bae hemi continue blong invest plante long ol Productive infrastrakja aktiviti, wetem ol nara Prodaktif Sector we isave kontribiut bigwan long Nasional Economy blong yumi blong save diversify long dependency tingting we istap raon long yumi. Mo olsem wan Soverein Kaontri, Kafman mi hemi mekem stan blong hemi klia mo bambae hemi kontiniu blong Borrow mo invest long ol area we funding hemi no save source long Grant finances.

     Tedei mi glad wetem pipol blong Vanuatu blong talem bigfala tankio tumas long Kafman mo People blong Japan blong save look save priority Infrastructure need blong mifala ol pipol blong Vanuatu. Long sem taem mi stap talem se Kaosel blong Minista blong kafman we mi lidim bambae istap go long path blong lukaotem ol development partna we isave kam forward blong asistem kaontri ia blong gat nara loan we hemi supplementem ol nara Infrastrakja blong hemi no only mitim priority blong Kafman, but tub long mekem sua se ol infrastrakja fasislti ia oli also komplien wetem internasional standards we ifolem IMO mo ISPS Codes mo ICAO mo IATA standards.

     Mi stap kam bak tu blong talem se ol inisiatif we Kafman, tufala divelopmen partna blong yumi olsem JICA mo MFAT wetem praevet sekta input olsem Ifira Ports Development Services (IPDS)  yumi isave tekem blong work tugeta hemi stap shoem wan rod blong developmen we bae isave stap grow aot igo long ol nara bigfala infrastrakja olsem Airport Projek mo ol narafala more tru long Paplik Praevet Partnasip arrenjmen we kafman blong tedei iwantem promotem plante.

     Mi wantem blong talemaot long yumi everiwan se mi proud bigwan long wan Indijines Lokal Kampani olsem IPDS (Konkratulesen IPDS) we hemi save kam antap wetem tingting blong work wetem Kafman blong yumi mo Kafman isave sapotem tingting ia blong Publik Praevet Patnaship arenjmen we Kafman hemi karem loan tru long Bilateral Nekosieson mo Praevet partna olsem IPDS tufala isave enter long Konseson Agrimen then bambae IPDS isave stap payem bak long tru long Kafman wete wan nara Agrimen olsem On-Lending Agreement blong save stap pem bak ODA Loan ia we ibin tekem long Kafman blong Japan tru long agency blong hem olsem JICA.

    Tedei wetem niufala fasiliti we istap long terminal ia hemi putum yumi Vanuatu long wanfala mark we hemi stap antap olsem “State of the Art” facility we hemi mekem se Vanuatu isave venture igo long niufala horizon long Shipping mo Ports services. Fasilitis we istap long port terminal ia Lapetasi hemi tekem yumi igo long wan step antap we bambae hemi also save helpem Kastom mo Inland Revenue espesily blong through long Aisekuda System we kafman igat blong bae isave kipim gud trak record long ol imports mo exports. Mo bae hemi save assist blong impruvem revenue kolekson blong kafman.

     Bifo mi stap endem toktok blong mi bakeken mi wantem remindem yumi, Chairman blong IPDS Board olsem main user mo operator long niufala fasiliti ia. Mi wantem askem help blong yu blong lukaotem ol asset ia blong mekem se bae hem tui save lukaotem yumi. Mi stap konkratuletem yufala blong save operet long newfala terminal ia wetem bride mo olsem we istap long Loan agreement wetem JICA ODA Loan ia se bambae Operator hemi takem full jarge long Operesen mo mentenens mo remindem ol user blong lukaotem gud blong hem tui save lukaotem yumi.

    Teriki Paunimanu mo IPDS  board

    Olgeta Distinguished GUESTS

    Ol mama mo ol bigman,

    Ol Friends mo Families,

    Ol Youngfala mo ol Pikinini

     

    Tankio tumas long lisen long ol toktok blong mi mo mi sta pray se bambae Papa Hae God bambae hemi richly plessem yumi everiwan.

    Tankio tumas

    Fafetai paulapa

    Arikato kosaimasi

    Merci beaucoup

    Offcanvas