Wan special siting blong paliaman folem chapta 14 blong constitution, wei hemi convened bitwin 9th mo 16th june 2016 blong primary purpose blo delibaretem ova bill blong constitution (seven amendment) act No....of 2016 (bill). Wan copy blong bill ia hemi attach wetem mo markem olsem appendix 2. Consequently long 16th june 2016, hemi unanimously resolved by parliaman olsem wei bill i talem sei comprising constitutional amendment wei i submit long ad hoc blong committe from purpose long futer scrutinising long proprosed amendement mo blong considerem blong kam wan broder consultation upon provision olsem wei Constitutional Amendment i talem.
Select your language
Promes afta promes be faenali ol hevi eqipmen, oli kasem Batnapni long sentrol Pentecost long tede blong hemi save riperem rod blong olgeta afta long moa long 20 yia we oli bin stap krae.
Nambatri politikol advaisa blong ofis blong praem minista, Jean Baptiste Buleben i talem se tede, ol fes lod blong ol hevi masin olsem buldoza, oli ko so long Batnapni long tede.
Mr Buleben i talem se bae ikat seken lod blong ol hevi masin ia we oli stap redi blong lego Santo blong go long sentrol Pentecost.
Hemi talem se fes wok blong ol hevi equipmen, bae oli mekem, hemi blong riperem rod we hemi go long Narua we hemi wan long olgeta big vilej blong sentrol Pentecost mo main saplaea blong kava ikam long Port Vila, Luganville, rijinol mo intanational maket.
Mr Buleben i talem se afta bae oli komplitim Narua rod, bae oli kam stat long Batnapni blong mekem mantenens blong rod igo kasem long saut Pentecost.
Mantenens blong rod blong sentrol Pentecost, hemi bin kam wan bigfala isiu long tede afta long ol promes we ol man blong politik oli go stap mekem long taem blong kampen blong eleksen. Evri politikol pati, oli kampen blong mantenem rod mo mekem ol niu rod long sentrol pat blong aelan be kasem tede ino kat mo naoia bae hemi tes hapen. Taem we memba blong palaman blong aelan, Charlot Salwai, hemi kam praem minista long las yia, ol pipol blong aelan ia, oli bin kat strong ting ting se aelan blong olgeta, bae hemi stap long top list blong mantenens blong rod mo kolta rod, hemi tekem ples long hem be long kastom blong Pentecost, wan hae tsif blong nakamal, hemi no save kakae bagegen hed blong pig long nakamal blong hem. Hemi givim long tsif blong nara nakamal. Ol pipol blong aelan ia, oli bin wandem mantenens, hemi tekem ples long fes yia blong gavman blong Mr Salwai hemia long las yia finis afta we oli harem se kolta rod, hemi kirap long Tanna mo Malekula. Gavman, hemi eksplenem prosidja blong wok long olgeta be oli riplae se long taem blong kampen, ol man blong politik, oli no tokbaut prosidja long olgeta be oli talem se bae oli mekem gud rod mo mekem niu rod. Long end blong las yia mo stat blong yia ia, ol fama blong sentrol Pentecost, oli kamap wetem wan ting ting mekem straek blong nomo sendem kava ikam long Port Vila blong pulum atensen blong gavman be afta oli luk se bae plande fanili long Port Vila, bae oli stap long problem sapos, oli nomo sendem kava ikam.
Ripot we Gavman website, hemi kasem long sentrol Pentecost long tede, pipol i rili glad blong luk se ol masin, oli go so long Batnapni long tede. Oli talem se maintenens blong rod ia, bae hemi helpem plande ol fama blong pat blong aelan ia. Sentrol Pentecost, hemi ples we hemi fidim maket blong Port Vila mo Luganville wetem renjional mo intanasional maket blong kava. Tede long Port Vila, hemi soem i klia se sapos wan sip, ino pas long wan wik long sentrol Pentecost, evri kava bar, oli sot long kava. Long ol pas wik, hemi lukim tu pipol blong aelan ia, oli pem moa trak mo karem igo long aelan ia. Ol draeva i talem se mentens blong rod long sentrol Pentecost, bae hemi helpem bigwan ol ona blong trak blong olgeta i save stap long taem. Oli talem se wetem kondisen blong rod we istap naoia, hemi no garanti longfala laef blong ol niu trak. Ol ona blong pablik transpot, oli talem se taem we wan niu trak, hemi kasem sentrol Pentecost long tede, afta long wan manis nomo, hemi olsem olsem ol trak ia, oli stap ron wetem ol empti plet bihaen. Oli talem se ol trak oli lusum valiu blong olgeta kuik taem nomo folem rabis kondisen blong rod. Rabis kondisen blong rod long sentrol pat blong aelan ia, hemi mekem se sam long olgeta pablik transpot, oli ronwe mo go stap sevesem not mo saut Pentecost. Hemia, hemi projek blong mantenens blong rod be long saed blong kolta rod, hemi wan difren projek. Gavman website, hemi andastan se projek blong kolta rod long aelan blong Pentecost, hemi nekis projek we bae hemi tekem ples afta long projek blong kolta rod long Tanna mo Malekula.
Rabis kondisen blong rod long aelan blong Pentecost Mr Salwai, hemi kasem plande tok tok from stat we hemi kam memba blong palaman blong aelan ia. Hemi bin go kasem level we hem yet, hemi spendem mani blong hem, blong pem mazut blong mekem sam long olgeta niu rod. Mr Salwai, hemi bin pat tu blong joenem, ol pipol blong Lebati blong oli isum hand blong olgeta o man pawa blong mekem se rod blong trak i save kasem ples blong olgeta. Hemi bin pem ol tul olsem spet mo baramin mo tekem pat blong katem rod blong brek tru long vilej blong olgeta.
Long end blong las yia, Mr Salwai mo minista blong pablik utiliti, Jotham Napat, tufala i bin go visitim blong ful aelan blong Pentecost. Tufala i bin witnesem trak blong tufala i fas long sopmat rod blong pablik.
Mr Napat i talemaut long olgeta tsif mo pipol blong Melsisi se hemi sem blong lukim kondisen blong rod blong sentrol Pentecost mo promesem olgeta se gavman blong Mr Salwai, bae hemi mekem rod blong olgeta.
Zone contenant les pièces jointes
Praem Minista, Charlot Salwai mo semtaem memba blong palaman blong Pentecost, Charlot Salwai i askem ol pipol blong PENAMA blong oli mas komitim olgeta moa blong developem provins blong olgeta.
Mr Salwai, hemi mekem toktok ia long taem blong selebresen blong PENAMA Day long las sarere, 16 septemba, long Saralana long Port Vila.
Praem minista i talem se komitmen, hemi mas stat long level blong olgeta lida olsem ol politikol lida igo daon kasem komuniti mo vilej level.
Hemi mekem tok tok ia afta we ino bin fulap pipol blong Penema we oli bin tekem pat long wan wokbaut we hemi bin stat long Indipendens Park i pas tru long main taon blong Port Vila mo igo finis long Saralana.
Mr Salwai i talem se ikat plande pipol blong Penama we oli stap long Port Vila be ino kat fulap pipol we oli go wokbaut long las sarere blong makem taem we Penama provins, hemi bin bon long hem. Penama provins, hemi karem tugeta, ol pipol we oli kamaut long aelan blong Pentecost, Maewo mo Ambae. Hemi talem se long Port Vila, ikat plande pipol we oli liv long hem mo oli kam long trifala aelan ia.
Hemi talem se long evri subdivisen blong ol graon we istap hapen long Port Vila long tede, bae yu no save mestem blong luk man Penama long hem.
Praem Minista i talem se sapos ino kat fulap pipol igo wokbaut, hemi from we pipol blong Penama, oli no kat komitmen long provins blong olgeta.
Hemi talem se tede Penama provins, hemi wan long olgeta provins we hemi prodiusim ol pikinini we oli skul gud olsem ol loea mo hemi askem olgeta blong kamap wetem wan rod o wan way blong developem provins blong olgeta. Praem Minista Salwai i talem se Penama, hemi wan provins we hemi rits long saed human risos mo natural risos blong hem be provins blong olgeta, hemi wan long olgeta provins we hemi no mekem inaf mani blong hem wan.
Praem Minista, Charlot Salwai, hemi visitim progres blong konstraksen blong ol niu building blong Malapoa College long wednesde namba 13 septemba.
Mr Salwai i talem se long ambassada blong China, Lui Quan mo kampani blong China we hemi buuildim ol haus ia se hemi hapi long progres blong wok. Hemi talem se praeoriti blong gavman, hemi still edukesen yet. Mr Salwai i talem se evri yia gavman, hemi spendem 25% blong budget blong hem long edukesen. Praem Minista Salwai i talem se hemi biliv strong se taem we ol pikinini blong Vanuatu, oli kasem gudfala edukesen bae olgeta yet, oli save developem kantri blong olgeta wetem ol save we oli kat.
Hemi talem se tede Vanuatu, hemi nidim moa enginia mo ol nara sekta olsem ol saentist mo hemi hop se wetem ol niu building ia, bae kantri i save moa pikinini blong hem we bae oli kualifae long ol nara sekta we hemi no kat ol kualifae pipol blong hem long hem yet.
Praem Minista i talem se hem yet taem we hemi bin minista blong edukesen, hemi kamap wetem polisi blong fri akses long edukesen from we hemi biliv strong long edukesen.
Ambassada Liu Quan i talem se China i redi blong helpem ol pikinini blong Vanuatu blong go skul long saed blong enginia. Hemi talem se ikat sam studen we oli kamaut long Malapoa College, oli stap stadi finis long China mo oli kamap wetem ol gud risal long stadi blong olgeta.
Bigman blong China ia, hemi talem se China, hemi kat ol enginia bitim ol nara kantri long wol tede. Hemi talem se bifo yumi stap harem Amsterdam from brij blong hem be tede, hemi kam nating komperem long ol lonfala mo bigfala brij we China, hemi kat.
Kampani we hemi stap bildim ol niu hauns ia, hemi talem se taem wok i finis, bae ol niu building ia, oli save karem wan total blong 800 studen wan taem. Oli ting ting blong finisim wok long manis julae long nekis yia.
Wan seremoni, hemi tekem ples long Nambatri eria blong Port Vila long wednesde namba 13 septemba mo hemi lukim ambassada blong China long Vanuatu, Liu Quan, hemi handem ova ol sport ekuipmen ikam blong Praem Minista, Charlot Salwai blong iusim long taem blong mini gem long disemba long yia.
Praem Minista Salwai i talem tankiu long gavman mo pipol blong China long help blong olgeta blong mekem se gem, bae hemi save wan sakses. Hemi talem se hemi neva luk Vanuatu, hemi priperem hem long saed blong sport long saed fisikol trening mo mani we kantri, hemi spendem blong hostem gem. Hemi talem se naoia we Vanuatu, hemi kat ol ekuipmen ia, kantri, hemi mas wok hat moa blong hostem bigfala gem we hemi Saut Pacific Mini Gem. Mr Salwai i talem se hemi wandem luk se long taem blong gem long disemba, Vanuatu, hemi mas lid long saed blong medeltali. Praem Minista Salwai i talem se Vanuatu ino oganaesem gem nomo blong mekem ol fren kantri oli kam blong luk biuti blong kantri be yumi hostem gem ia blong win. Hemi talem se Vanuatu hemi hapy kantri long wol finis be yumi mas winim moa medol mo kam top long medeltali.
Ambassada Liu Quan i talem se kantri blong hem, hemi glad blong helpem Vanuatu blong hostem gem ia.
Ol sport ekuipmen ia, wan kampani blong China we hemi saplaem ol tul blong sport long taem blong Olympic long China mo long Rio, hem bagegen, hemi givim long Vanuatu.
Ofis blong gem long Port Vila i talem se evri sport ekuipmen blong iusim long gem, evriwan istap long Port Vila finis.
Ova long wan 1 000 pipol we oli stap long Olen Namba long end igo long wota sos, oli kat stat long las manis wan aid post blong olgeta.
Aid post ia, ol tsif mo pipol blong Olen, oli bin askem long praem minista, Charlot Salwai, minista blong edukesen mo semtaem MP blong Port Vila, Jean Pierre Nirua mo mea blong Port Vila, Ulrich Sumptoh.
Request blong ol tsif mo pipol blong Olen ia, oli bin mekem long taem blong wan seremoni blong kansela, Elison Tabi, hemi kam joenem RMC blong Praem Minista Salwai.
Oli talem se pipol blong Olen, oli rili fainem i hat blong kasem bus o taxi blong go long main hospital o long ol nara aid post spesiali long naet. Oli talem se aid post ia, bae hemi helpem olgeta blong oli save kasem tritmen long ples blong olgeta nomo. Oli talem se hemi rili hat blong ol mama taem we oli nidim blong go long hospital long nait o long taem we hemi ren.
Niu aid post ia, mea blong Port Vila, Mr Sumptoh, hemi ofisioli openem long 26 Okis mo givim nem blong hem, Faith Base Aid Post.
Taem we Gavman Website, hemi visitim Faith Base Aid Post ia long wik ia, hemi fainem se pipol blong Olen, oli rili glad long hem mo oli talem tankiu long gavman mo Port Vila Municipal Kansel from. Ino wan manis yet be smol aid post ia, hemi tritim ova long 100 pipol finis. Nes i talem se plande long olgeta, hemi ol pikinini. Nes i talem se hemia i ol smosmol sik we sapos ino bin kat aid post, ol parents, oli mas spendem moa long 300 vatu blong go kasem tritmen long Port Vila Central Hospital.
Nasional dei blong ol jifs we i stap long 5 march 2017, hemi wan okesen blong niu president blong Ripablik blong Vanuatu FR Baldwin Lonsdale blong mitim wan long ol respected jif blong Tanna we everyman i save, jif Isaac Wan. Tufala Jifs mit long independent park mo tufala i marj wetem ol counterparts jif long araon long kaontri blong makem jif dei long Port Vila. Jif Wan hemi wan long ol ae jif blong Jhon Frum long Tanna mo tu hemi commanda blong polis blong Jhon frum. Hemi kam long port Vila accompagnied long wan long body kat we i werem full millitary uniform.
Praem minista Charlot Salwai, hemi saenem tede aftenun long ofis blong praem minista wan agrimen blong gavman blong China, hemi givim 146 wota tang wetem ambasada blong China blong Vanuatu, Liu Quan.
Mr Liu Quan i talem se China, hemi sapotem big wan isiu blong daonem ifek blong klaemet jenj mo hemi komitim hem plande blong folem wanem we istap long Paris Agreement.
Hemi talem se hemi hop se ol wota tang ia, bae oli helpem plande olgeta pipol we oli stap long nid blong kat wan gudfala wota long taem blong drae sisen. Ambasada blong China i talem se wota hemi impoten long laif mo hemi hapi bigwan blong hemi save helpem ol pipol blong Vanuatu long ol wota tang ia.
Praem Minista Salwai i talem tankiu long gavman mo pipol blong China from ol wota tang ia. Mr Salwai talem tankiu tu long China blong hemi save sapotem strong COP 21. Hemi talem se Vanuatu, hemi wan long olgeta kantri we hemi fesem ifek blong klaemet jenj mo kaen help ia, hemi save helpem ol pipol blong oli save kat seif mo klin wota.
Praem minista i talem se gavman, bae hemi mekem sua se ol wota tang, bae oli save kasem olgeta pipol we oli nidim.
Ol wota tang ia, ikat 131 blong 6 000 lita mo 15 blong 10 000 lita.
Kaonsel blong olgeta Minista, long miting blong hem long 31 Okis 2017, hemi bin disaed se Vanuatu hemi save gohed wetemsaening blong PACER Plus Agreement long miting blong Pacific Islands Forum Leaders we bambae hemi tekem ples long Apia, Samoa long nekis manis.
Antap long desisen blong saenem PACER Plus Agreement, Gavman blong Vanuatu hemi resem ap tu olgeta nara isiu we hemi nid yet blong lukluk blong hem. Hemi talem tu se fasin blong stopem akses long saed blong bisnis blong kava long olgeta maket long Australia hemi no stret sipos tufala kantri ia iwantem gat wan gud tred rilesen bitwin tufala mo hemi wantem blong Australia hemi mas stopem olgeta kaen fasin blong mekem tred ia we hemi no stret tumas.
Gavman blong Ripablik blong Vanuatu hemi wantem blong riniuwem bageken bae later ol agrimen wetem Australia mo New Zealand blong givim visa eksamsen long olgeta Ni-Vanuatu visita long tufala kantri ia we bambae i save mekem se i gat fri muvmen blong olgeta man. Hemia hemi pat blong olgeta wok blong mekem se I save gat moa ekonomik intagreisen insaed long rijen.
Gavman blong Vanuatu hemi talem tu se igat nid blong Australia wetem New Zealand blong tufala i mas mekem moa long saed blong divelopmen asistens program blong tufala I go long olgeta Forum Island Countries, i no tru long PACER Plus framewok nomo be hemi mas leftemap tu olgeta bae latrol developmen asistens program long FICs mo sapotem badjet blong Vanuatu taem we bambae hemi stap fesem olgeta jenis long olgeta yia we i stap kam.